TIENWOGIKAL 98 - BUKUIT NE TILIIL Sireet ne Dutero Kanon

Ilasu Kirwoogindetap Ng'wony

¹ Ee, otyenji Kamuktaindet ne Toroor tyendo ne leel; Amu ki koyai tuguuk che kikwong'ee: Ki yachi yetunet ineendet eunnyi ne po tai, eunnyi ne tiliil.

² Kigobarta Kamuktaindet ne Toroor yetunennyi: Kigong'aany imandanyi eng' taitap pororyosyek.

³ Kigobwaat rireenennyi ak imandanyi eng' kootap Israel: Ki kogeer tabanwek tugul che po ng'wony yetunetap Kamuktaindennyo.

⁴ Otyenji Kamuktaindet ne Toroor eng' kutitap poiboiyet, ng'wony komugul: Oong'et tyendo, ak otyen eng' poiboiyet, ee, otyen kalasunoik.

⁵ Otyenji Kamuktaindet ne Toroor kalasunoik eng' ketubet; Eng' ketubet, ak eng' kutitap kalasunet.

⁶ Eng' igondisyek, ak cheetap iryageet Otyen eng' kutitap poiboiyet eng' taitap laitoryat, Kamuktaindet ne Toroor.

⁷ Ingomoror nyanjet, ak tuguuk che nyiitaat olooto; Ng'wony, ak icheeget che menyei olooto;

⁸ Ingoraprap eunekwak ainoosyek; Ingotyenso tuloonook kibagenge eng' poiboiyet;

⁹ Eng' taitap Kamuktaindet ne Toroor, amu nyoonei korwookyin ng'wony: Tuun irwookyin ng'wony eng' imanda, Ak korwookyi piik eng' iman.