TIENWOGIKAL 97 - BUKUIT NE TILIIL Sireet ne Dutero Kanon

Toroornatet ne po Laitornatetap Kamuktaindet

¹ Laitorani Kamuktaindet ne Toroor; ingobaibait ng'wony; ingogaskei emotinwek che chaang' che mi ngeguusyek.

² Yiemei ineendet poolik ak mesundeito: Ole tebee ng'echerennyi ne po pounateet ko imanda ak kirwooget.

³ Indoi maat eng' ineendet, Ak peelei puunikyik eng' komoswek tugul.

⁴ Ki ikwenyi ng'wony ilotikyik; Ki keer emet, ak kobotan.

⁵ Kichootyo tuloonook eng' taitap Kamuktaindet ne Toroor ko uu temeniet, Eng' taitap Kamuktaindet ne po ng'wony komugul.

⁶ Iboortoi kipsengwet imandanyi, Ak ki kogeer piik tugul toroornatennyi.

⁷ Ingolilanso tugul che otei kanamonik che ki kiwai, Che lasegei tuguuk che ma tilei kiy: Ogutung'ji ineendet, okweek kamuktaik tugul.

⁸ Ki kas Zion, ak ki igaskei, Ak kiboiboitu tiibiigap Judah; Amu kirwoogutiguk, ee Kamuktaindet ne Toroor.

⁹ Amu inyee, Kamuktaindet ne Toroor, ko ii toroor miising' eng' ng'wony komugul: Ki itororitu miising' isiir kamuktaik tugul.

¹⁰ Ee okweek che ochame Kamuktaindet ne Toroor, owech yaityet; riibei saboonwegap chechiik che tiliileen; saru icheek eng' eutap kiptengeginik.

¹¹ Kigooljin lapkeiyet che po iman, Ak ki kooljin kagasetapkei che po iman eng' mugulelwek.

¹² Ogaaskei eng' Kamuktaindet ne Toroor okweek che oo po iman; Oweekyi kongoi kainennyi ne tiliil.