TIENWOGIKAL 96 - BUKUIT NE TILIIL Sireet ne Dutero Kanon

Kamuktaindet ko Laitoryat

¹ Otyenji Kamuktaindet ne Toroor tyendo ne leel: Otyenji Kamuktaindet ne Toroor, ng'wony komugul.

² Otyenji Kamuktaindet ne Toroor, oberuur kainennyi; Obarte yetunennyi eng' peetuut agoi peetuut.

³ Omwaite toroornatennyi eng' pororyosyek, Ak poisyonikyik che kikwong'ee eng' piik tugul.

⁴ Amu oo Kamuktaindet ne Toroor, nyolu kilas ineendet miising': Kanyool kiywei ineendet kosiir kamuktaik tugul.

⁵ Amu kamuktaik tugul che po piik koma tilei kiy: Ago kiyaei Kamuktaindet ne Toroor kipsengwet.

⁶ Mi tainnyi teegisto ak etunateet: Mi koonnyi ne tiliil kimnateet ak korooronindo.

⁷ Ogoochi Kamuktaindet ne Toroor, okweek tilyonutigap piik, Ogoochi Kamuktaindet ne Toroor toroornatet ak kimnateet.

⁸ Ogoochi Kamuktaindet ne Toroor toroornatet ne nyoljin kainennyi: Oibu kagoochinet, ak obwa seremusyekyik.

⁹ Ogutung'ji Kamuktaindet ne Toroor eng' karaaranindap tiliilindo: Potan eng' tainnyi, ng'wony komugul.

¹⁰ Omwa eng' pororyosyek ole, Laitorani Kamuktaindet ne Toroor: Ki kigimit ng'wony si ma ng'eigei: Irwookyin piik eng' imanda.

¹¹ Ingogaskei kipsengwet, ak ingobaibait ng'wony; Ingomoror nyanjet, ak tuguuk che nyiitaat olooto;

¹² Ingogaskei mbareenik, kobooto tugul che mi olooto; Si kotyenso anyun eng' poiboiyet keetiik tugul che mi timiin;

¹³ Eng' taitap Kamuktaindet ne Toroor, amu nyoonei: Amu nyoonei korwookyin ng'wony, Irwookyin ng'wony eng' imanda, Ak korwookyin piik eng' imandanyi.