TIENWOGIKAL 95 - BUKUIT NE TILIIL Sireet ne Dutero Kanon

Kuurset agobo Saaet ak Kasetap iit

¹ Obwa, ongetyenji Kamuktaindet ne Toroor: Ongetyenji rwandetap yetunennyo eng' kutitap poiboiyet.

² Ongebwa tainnyi keeweekyi kongoi, Ongetyenji ineendet eng' kutitap poiboiyet eng' tyenwogigap kalasunet.

³ Amu Kamuktaindet ne oo Kamuktaindet ne Toroor, Ineendet laitoryat ne oo ne siirei kamuktaik tugul.

⁴ Mi eunnyi komoswegap oriit che po ng'wony; Ak chechiik ak icheek walisyegap tuloonook.

⁵ Nenyi nyanjet, ineendet ne kiyaei; Ak kiyaei eunekyik emet ne yaamaat.

⁶ Obwa kilasu, ak king'uruukyi; Ongegutung'se eng' taitap Kamuktaindet ne Toroor Yaindennyo:

⁷ Amu ineendet Kamuktaindennyo, Ak ki piik che po akweennyi, keechiiregap eunnyi, Ee, kata myee ngo kas okweek kutinnyi rani!

⁸ Amat ouiit mugulelwekwok, ko uu eng' Meribah, Ko uu eng' peetuutap Massah eng' surkwen:

⁹ Ye kiyoma kwanisyekwok, Kotyema, ak ki keer poisyennyu.

¹⁰ Ki aaragen kenyiisyek artam eng' ibinooto, Ak ki ale, Icheeget ko piik che mastoi eng' mugulelwekwak, Ak tomo konai ortinwekyuk:

¹¹ Ki ayosye anyun eng' nereegekyuk, Ale, Ma itei icheek kamuung'ennyu.