TIENWOGIKAL 94 - BUKUIT NE TILIIL Sireet ne Dutero Kanon

Yaaktaetap Mugetuut ak Sarunet

¹ Ee Kamuktaindet ne Toroor, inyee Kamuktaindet ne po yaaktaetap mugetuut, Iluu, inyee Kamuktaindet ne po yaaktaetap mugetuut.

² Ng'eet, inyee kirwoogindetap ng'wony: Igeerchi menotik ko uu ye nyoljin.

³ Ee Kamuktaindet ne Toroor, tyanitu, Iterteerisyei kiptengeginik kot kotyanit?

⁴ Ng'alaalati icheek ng'aleek che chaang', ng'alaale menoteet: Ilasugei yaik tugul che po tengekto.

⁵ Tuatui icheek piiguk, ee Kamuktaindet ne Toroor, Ak konyalili icheek poroteng'ung'.

⁶ Parei mosoget ak toondet, Ak rumei che ma tinyei sigiik.

⁷ Ak koleen, Ma keerei Kamuktaindet ne Toroor, Ama mage kiy Kamuktaindetap Jakobo.

⁸ Obwaat, okweek che o koseng'eng'inik eng' kwenutap piik: Ak okweek che oo perberen, ong'omegitu auyo?

⁹ Tos ineendet ne kiyaei itit, koma kastoi? Tos ineendet ne kiyaei koonyek, koma keertoi?

¹⁰ Tos ma itigoni ineendet ne kere kong' pororyosyek, Ne ineendet ne ineeti piik naet?

¹¹ Ingen Kamuktaindet ne Toroor kabwaatutigap chii, Kole puch.

¹² Igasegei chii ne igeregong', ee Kamuktaindet ne Toroor, Ak ineeti eng' ng'atuutiguk;

¹³ Si kobiit imuung'ji eng' peetuusyegap nyalilda, Agoi kebalji keriinget kiptengeginik.

¹⁴ Amu ma toortai `Kamuktaindet ne Toroor piikyik, Ama metoi porotennyi.

¹⁵ Amu weekyingei kirwooget imanda: Ak kosubi nooto tugul che po iman eng' mugulelwekwak.

¹⁶ Tos ng'oo ne ng'eetei kotoreta eng' yaigap yaityo? Tos ng'oo ne tononi kotoreta eng' kiptengeginik?

¹⁷ Nda ki ma ek toreteennyu Kamuktaindet ne Toroor, Ta kiga kochaakta saboondanyu komeny ye mi siisek.

¹⁸ Ye kinga le, Ichaboitoi keldanyu, Kotiia rireeneng'ung', ee Kamuktaindet ne Toroor.

¹⁹ Eng' chaang'indap kabwaatutik che mi oriitinnyu koboiboi kagaigaosyeguk saboondanyu.

²⁰ Tinyei yamdaet nee ng'echereetap pounatetap tengekwogik ak inyee, Ne chobei yaitwogik eng' ng'atuutik?

²¹ Iyumigei agobo saboondap ne po iman, Ak korwookyi korotiik che ma tinyei tengek.

²² Ago ki koek Kamuktaindet ne Toroor irimennyu ne kooi; Ak Kamuktaindennyu rwandet ne amwechini.

²³ Ak ki koweekyi icheek tengektonywa, Ak koisto icheek amu tengektonywa; Ak kowong' icheek Kamuktaindet ne Toroor, Kamuktaindennyo.