TIENWOGIKAL 92 - BUKUIT NE TILIIL Sireet ne Dutero Kanon

Kogoitoetap Kongoi

¹ Kiit ne myee ko keeweekyi kongoi Kamuktaindet ne Toroor, Ak ketyenji kaineng'ung' eng' kalasunoik, ee inyee Ne Toroor Miising':

² Kibarta chamyeng'ung' ne tala karon, Ak imandang'ung' lagatut age tugul,

³ Eng' kibugandet ne tinyei inoik taman, ak kibugandet age; Kobooto ketubet ne cheei miising'.

⁴ Amu ki ibaibaa, ee Kamuktaindet ne Toroor, eng' poisyeng'ung': Agasigei eng' poisyonigap euneguk.

⁵ Eechen ne tya poisyoniguk, ee Kamuktaindet ne Toroor! Ma tinyei ole poochin kabwaatutiguk.

⁶ Ma ingen chiito ne uu tyony; Ama iguitos ne perber;

⁷ Ye kaeegitu kiptengeginik ko uu susweek, Ak ye kanyoor perurto yaigap tengekto; Ko si keng'em agoi koigeny:

⁸ Ago inyee, ee Kamuktaindet ne Toroor, imi parak agoi koigeny.

⁹ Amu, keero, ee Kamuktaindet ne Toroor, puuniguk, Amu, keero, lustos puuniguk. Kiyestooti yaigap tengekto tugul.

¹⁰ Ago kiitoroor kuinennyu ko uu kuinetap soet: Kagiilena mwaita ne karaaran.

¹¹ Kogogeer konyekyuk ak icheek magennyu eng' puunikyuk, Ak kogogas itiikyuk magennyu eng' yaigap yaityo che setyina.

¹² Sabei ne po imanda ko uu tiiret: piitei ko uu tarakwetap Lebanon.

¹³ Icheeget che ki kiminji kootap Kamuktaindet ne Toroor Koeegitu eng' seremusyegap kootap Kamuktaindennyo.

¹⁴ Ta koiitos agot ko kagoosegitu; Tuonitu amu peek che eei, ak kotunendos:

¹⁵ Si kobiit kobarta kole po iman Kamuktaindet ne Toroor; Ineendet rwandennyu, ama mi kiy ne ma po iman eng' ineendet.