TIENWOGIKAL 91 - BUKUIT NE TILIIL Sireet ne Dutero Kanon

Riipseetap Kamuktaindet

¹ Ineendet ne menyei ole ung'aat ne po Ineendet Ne Toroor Miising' Kotebee nooto urwetap Ineendet Ne po Kamuktaet.

² Amwae agobo Kamuktaindet ne Toroor ale, Ineendet ole amwechini ak ko irimennyu; Kamuktaindennyu ne amang'u.

³ Amu saruun eng' mesteetap namindetap toriitik, Ak eng' koroito ne parisyei.

⁴ Tugenen koroorikyik, Ak inyooru ole imwechini eng' kebebaikyik: Imandanyi ko long'eet ak ne kiteektoegei.

⁵ Meiywei kamuisetap kemoi, Anan kipchabet ne kimwoktoi peet;

⁶ Anan koroito ne wendoti eng' mesundeito, Anan ng'emisyet ne parisyei peet.

⁷ Ibutos eliphuut eng' ole neegiteenen, Ak ibutos eliphuusyek tamanu eng' ole neegitee eung'ung' ne po tai; Ago mariikyinin.

⁸ Ago igeere eng' konyeguk, Igeere melektap kiptengeginik.

⁹ Amu inyee Kamuktaindet ne Toroor, ko ii ole amwechini! Ki iyai Ineendet Ne Toroor Miising' koek meng'ooteng'ung';

¹⁰ Ma nyoorun yaityet age tugul, Mariikyin koong'ung' koroito age tugul.

¹¹ Amu iyomisi malaikaisyekyik koriibin, Si koriibin eng' ortinweguk tugul.

¹² Kanabin eng' eunekwak, Si marus koita keeldong'ung'.

¹³ Ityeche ng'etundo ak ereneet: Ityeche eng' keelyeguk ng'etundo ne neran ak cheluguit.

¹⁴ Amu kigochama, asaru eng' nooto anyun: Atoroori ineendet, amu ki konai kainennyu.

¹⁵ Kuura, ak aitenji; kitebyei tuwai eng' nyalilda, asaru ineendet ak agoonyit.

¹⁶ Agoochini ineendet kosap kenyiisyek che chaang', Ak aboorchini yetunennyu.