TIENWOGIKAL 90 - BUKUIT NE TILIIL Sireet ne Dutero Kanon

KITABUUT NE PO ANG'WAN (T.Kal 90-106) Kamuktaindet ne po Koigeny ak Chii

¹ Ee Kiptaiyat, ki iegu ole ki menye Eng' ibinwek tugul.

² Ye kitom kobiit tuloonook, Anan ye kitom iyai emet ak ng'wonyut, Ii Kamuktaindet, kobooch keny agoi koigeny.

³ Iweektoi chiito kwo temburyek; Ak ileen, “Oweege, okweek weeriigap piik.”

⁴ Amu kergei kenyiisyek eliphuut eng' taing'ung' Ak amut ne kogosiirto, Ak ko uu riipseet ne po kemoi.

⁵ Imuti koba ko uu mogoochek; uu icheek kanuuget: Uu icheek karon susweek che piitos.

⁶ Ing'atos karon, ak koeegitu; Kitemei koskoleny, ak koresyo.

⁷ Amu kagiwong'wech eng' nereegeguk, Ak ki aragendosi eng' nyitateng'ung'.

⁸ Ki inde tengekwogikyok taing'ung', Ak ki inde tengekwogikyok che ung'ootiin lapkeiyetap togeng'ung'.

⁹ Amu ki kosiirto peetuusyekyok tugul eng' nereegeguk: Kiwong'u acheek kenyiisyekyok ko uu atindyot ne ki kimwa.

¹⁰ Peetuusyegap kenyiisyekyok koitei kenyiisyek tamanwogik tisap, Ago eng' che kiimeen koitei tamanwogik sisiit; Ago menatennywa ko nyalilda ak arageneet; Amu choktoi ko uu nooto, ak keebe kesiirte.

¹¹ Ng'oo ne ingen kimnateetap nereegeguk, Ak nereegeguk che ng'woneen, ko uu ye nyoljin kiywein?

¹² Ineetech anyun kiit peetuusyekyok, Si kobiit kesich muguleldo ne po utaatyet.

¹³ Weeguge, ee Kamuktaindet ne Toroor; tyanitu? Ak irireegei kiboitiniguk.

¹⁴ Ee, paech kebiye eng' rireeneng'ung' karon; Si kobiit keboiboitu ak kigaskei eng' peetuusyekyok tugul.

¹⁵ Ibaibaech eng' peetuusyek che tee che ki inyalilech, Che tee kenyiisyek che ki kigeer yaityet.

¹⁶ Ingotook poisyoniguk eng' kiboitiniguk, Ak telunateng'ung' eng' lagokwak.

¹⁷ Ak ingotebenech karaaranindap Kamuktaindet ne Toroor, Kamuktaindennyo: Ak igimitwech poisyonigap eunekyok; Ee, igimit poisyonigap eunekyok.