TIENWOGIKAL 89 - BUKUIT NE TILIIL Sireet ne Dutero Kanon

Arorutyet ne po Kamuktaindet ak Daudi

¹ Atyeni agobo rireenetapkei ne po Kamuktaindet ne Toroor agoi koigeny: Aboortoi eng' kutinnyu imandang'ung' eng' ibinwek tugul.

² Amu ki ale, Teegoksei koigeny rireenetapkei. Igimiit imandang'ung' eng' kipsengwet.

³ Ki imwa ile, “Ki kiyomiske ak nenyu ne ki alewen, ki ayosyechi Daudi kiboityondennyu aleenji:

⁴ ‘Agimiiti kesweguk koigeny, ak agimiiti ng'echereeng'ung' ne po laitornatet agoi ibinwek tugul.’ ”

⁵ Ilasu kipsengwet kwang'utiguk, ee Kamuktaindet ne Toroor; Ak ilasu agine imandang'ung' eng' tuiyetap che tiliileen.

⁶ Amu mi ng'oo eng' parak ne kirogendoe Kamuktaindet ne Toroor? Tos mi ng'oo eng' weeriigap che kiimeen ne kergei ak Kamuktaindet ne Toroor,

⁷ Ineendet Kamuktaindet ne kiywei miising' eng' tuiyetap che tiliileen, Ne kiywei kosiir tugul che kiyiem ineendet?

⁸ Ee Kamuktaindet ne Toroor, Kamuktaindet ne po lugoosyek, Ng'oo ne po kamuktaet ko uu inyee, ee Kamuktaindet ne Toroor? Ak yiemin imandang'ung'.

⁹ Inyee ne ibou wasetapkei ne po nyanjet: Ye kang'eet mildaennyi pogei igeregong' kosiis.

¹⁰ Ki ituatui Rahab ko uu ne kagebar. Ki iyeste puuniguk eng' eutap kimnateng'ung'.

¹¹ Cheguuk kipsengwet ak ng'wony agine: Inyee ne ki iyai ng'wony ak che nyiitaat olooto.

¹² Ki itau iyai murot kaataam ak murot tai: Tyendos eng' poiboiyet Tabor ak Hermon eng' kaineng'ung'.

¹³ Itinye euut ne po kamuktaet: Kiim eung'ung', ak toroor eung'ung' ne po tai.

¹⁴ Ole tebee ng'echereeng'ung' ne po pounateet ko imanda ak kirwooget: Indoenen rireenetapkei ak imanit.

¹⁵ Poiboen piik che ingen tyendap poiboiyet: Pendote icheek lapkeiyetap togeng'ung', ee Kamuktaindet ne Toroor.

¹⁶ Igasegei peetuut komugul eng' kaineng'ung': Ak kitoroori icheek eng' imandang'ung'.

¹⁷ Amu inyee karaaranindap kimnateennywa: Ak kitoroori kuinennyo eng' chameng'ung'.

¹⁸ Amu po Kamuktaindet ne Toroor long'ennyo; Ak po Ineendet ne Tiliil ne po Israel laitoryandennyo.

¹⁹ Ki ing'alaalji anyun cheguuk che tiliileen eng' ng'ang'utik, Ak ileenjini, Kaalaakyi toreteet ineendet ne nyigan; Ki atoroor ne ki kilewen eng' piik.

²⁰ Ki anyooru Daudi kiboityondennyu; Ki aiile ineendet mwaitanyu ne tiliil:

²¹ Ne tuun kimitu eunnyu eng' ineendet; Igimiiti agine eunnyu ineendet.

²² Ma imuuchi puunyoot koyachi ineendet kiy ne ya; Anan konyaliil weeriitap yaityet ineendet.

²³ Atuatui puunikyik eng' tainnyi, Ak abir che wechei ineendet.

²⁴ Ak tebyei kobooto ineendet imandanyu ak rireenennyu; Ak tororitu kuinennyi eng' kainennyu.

²⁵ Agoochini eunnyi koboi nyanjet, Ak koboi ainoosyek eunnyi ne po tai.

²⁶ Riirchino koleen, Ii abba inyee, Kamuktaindennyu, ak rwandetap yetunennyu.

²⁷ Ayae ineendet koek taaitanyu, Koeet kosiir laitorinik tugul che po ng'wony.

²⁸ Agonorchini rireenennyu koigeny, Ak tononi eng' kimnateet kayomisennyu kobooto ineendet.

²⁹ Achamjini iyotennyi agine kotebi koigeny. Ak ng'echerennyi ne po laitornatet ko uu peetuusyegap kipsengwet.

³⁰ Ago ngo pagaakta lagokyik ng'atuutyennyu, Ak ngo ma pendatee kirwoogutikyuk;

³¹ Ngot kobut kaneetisyosyekyuk, ak ngo ma riip ng'atuutikyuk;

³² atigoone anyun pistoennywa kirokto, ak atigoone tengektonywa pirutik.

³³ Ago ma istoi rireenennyu kot kogestagei eng' ineendet, Amayae koek puch imandanyu.

³⁴ Mabute kayomisennyu, Amawale kiit ne ki mang'une kutinnyu.

³⁵ Ki ayosye konyil agenge eng' tiliilindanyu; Ale, Ma perberi Daudi;

³⁶ Tebyei iyotennyi koigeny, Ak ng'echerennyi ne po laitornatet ko uu asiista eng' tainnyu.

³⁷ Ki kimiti koigeny ko uu arawet, Ak ko uu paornateet ne po iman ne mi parak.

³⁸ Ago kiitimde ak ieesye, Ki inereekyi neng'ung' ne iilaat.

³⁹ Ki isas kayomiset ne po kiboityondeng'ung'; ak ki ing'wanit naaryeennyi ne po laitornatet kot iwiirchi ng'wony.

⁴⁰ Ki ibut ng'otonokyik tugul; Ki iluul irimoikyik.

⁴¹ Rebe ineendet tuguukyik piik che siirtoi: Ki koek ne iteweerat eng' piigap kokwennyi.

⁴² Ki itoroor eutap tai ne po puunikyik; Ki igoochi puunikyik tugul koboiboitu.

⁴³ Ee, ki iweekyi let ng'atiibiindap rotwennyi ne po chok, Ama igoochi kobelis eng' lugeet.

⁴⁴ Ki iunde tiliilindanyi kogeskei. Ak ki iwiirchi ng'wony ng'echerennyi ne po laitornatet.

⁴⁵ Ki itil kong'ering'itu peetuusyegap ming'inatennyi; Ki ilaakyi ineendet teweernateet.

⁴⁶ Iunyegei kot kotyanit, ee Kamuktaindet ne Toroor? Laldos nereegeguk ko uu maat kot kotyanit?

⁴⁷ Ee, ibwaat ole tee nwagindap peetuusyekyuk: Ki itau iyai weeriik tugul che po piik koek puch agobo nee?

⁴⁸ Tos ng'oo chii ne sabei ne ma keerei meet, Ne tos sar saboondanyi eng' kimnateetap meet?

⁴⁹ Ee, Kiptaiyat, mi ano rireenosyeguk che po keny, Che ki iyasyechi Daudi eng' imandang'ung'?

⁵⁰ Ibwaat, ee Kiptaiyat, sastaet ne po kiboitiniguk; Ko uu ye aiboti eng' tegeennyu kereetap kong' ne po piik tugul che chaang';

⁵¹ Nooto ne ki kogerisye kong' puuniguk, ee Kamuktaindet ne Toroor, Che ki kogerate kong' kakwautigap neng'ung' ne iilaat.

⁵² Iberuurot Kamuktaindet ne Toroor agoi koigeny. Amen, ak Amen.