TIENWOGIKAL 88 - BUKUIT NE TILIIL Sireet ne Dutero Kanon

Saaet agobo Toreteet

¹ Ee Kamuktaindet ne Toroor, Kamuktaindetap yetunennyu, Kaariir eng' taing'ung' peet ak kemoi:

² Ingonyo saaennyu oldang'ung'; Epchi iit riirekyuk:

³ Amu nyiitaat nyalilwogik saboondanyu, Ak kagoriikta saboondanyu ye mi meet.

⁴ Kagiitita che choorchingei keriinget; Auu chii ne ma tinyei toreto:

⁵ Ki kiwiircha ye mi che ki kobek, Ko uu che kigebar, che ruitos eng' kererit, Che ma ibwaati inyee kogeny; Ak kigeisto eng' eung'ung'.

⁶ Kaindea keriinget ne loo miising', Eng' oldinwegap mesundeito, eng' rirosyek.

⁷ Irurunya nereegeguk, Ak kainyalila eng' peeguk tugul che mildogei.

⁸ Kaistoena che kingenge kolooegitu; kaiyaa aek ne wegot eng' icheek. Kigegera ak ma amuuchi among' saang'.

⁹ Kagochuchuiso konyekyuk amu nyalilda: Aguurin peetuut age tugul, ee Kamuktaindet ne Toroor, Kaayogaun eunekyuk.

¹⁰ Tos iboorchi kwang'utik piik che ki kobek? Tos ng'eetyo che ki kobek si kolasun?

¹¹ Tos kiboortoi chamyeng'ung' ne tala eng' kererit? Anan imandang'ung' eng' ye mi ng'emisyet?

¹² Tos naaksei kwang'utiguk eng' mesundeito? Tos naaksei imandang'ung' eng' emet ne po piik che ki keutye?

¹³ Ago ki ariirchin, ee Kamuktaindet ne Toroor, Ak nyoonei saaennyu karon oldang'ung'.

¹⁴ Kamuktaindet ne Toroor, amu nee si ioon saboondanyu? Amu nee si iung'ena togeng'ung'?

¹⁵ Ki kinyalila kobooch koa ming'in agoi ra, ak neegit ame: Atoptobeni ye amuitoi agobo kamuisosyeguk.

¹⁶ Katucha nereegeguk che laldos; Kagowong'wa kamuisosyeguk.

¹⁷ Ki pwa koyiema ko uu peek peetuut komugul; Ki yiema komoswek tugul.

¹⁸ Ki istoena chamaneet ak chorweet, Ak miitei mesundeito icheek che ingeno.