TIENWOGIKAL 86 - BUKUIT NE TILIIL Sireet ne Dutero Kanon

Saaet agobo toreteet kegirinda Puunik

¹ Ing'uruuge kasa, ee Kamuktaindet ne Toroor, ak iwolwoo; Amu aa kibanania ama tinye kiy.

² Riip saboondanyu; amu aa chii ne po iman: Ee inyee Kamuktaindennyu, saru kiboityondeng'ung' ne imang'un.

³ Rireena, ee Kiptaiyat; Amu ariirchinin peet komugul.

⁴ Ibaibai saboondap kiboityondeng'ung'; Amu atokyinin saboondanyu, ee Kiptaiyat.

⁵ Amu ii myee inyee Kiptaiyat, ak ii choboot inyochi kaat, Ak itinye chaang'indap rireenetapkei eng' icheek che kuurin.

⁶ Kaswa saaennyu, ee Kamuktaindet ne Toroor; Epchi iit kutitap soomutikyuk.

⁷ Aguurin eng' peetuutap nyalildanyu; Amu iwolwoo.

⁸ Ma mi ne uu inyee eng' kamuktaik, ee Kiptaiyat; Ama mi poisyonik alak che uu cheguuk.

⁹ Tuun pwoonei pororyosyek tugul che ki iyae Ak kogutung'so eng' taing'ung', ee Kiptaiyat; Ak kotoroor icheek kaineng'ung'.

¹⁰ Amu ii oo, ak iyae kwang'utik; Ii Kamuktaindet inyegei.

¹¹ Ineeta oreng'ung', ee Kamuktaindet ne Toroor; si awendotee imandang'ung': Ituiye muguleldanyu si koywei kaineng'ung'.

¹² Alasun, ee Kiptaiyat Kamuktaindennyu, eng' muguleldanyu komugul; Ak atoroori kaineng'ung' koigeny.

¹³ Amu oo rireeneng'ung' eng' anee; Ak ki isaru saboondanyu eng' keriinget ne loo miising'.

¹⁴ Ee Kamuktaindet, kagong'eetya menotik, Kogocheeng' saboondanyu tuiyetap sogoranik, Ak ma ibwaatin icheek.

¹⁵ Ago inyee, ee Kiptaiyat, ko ii Kamuktaindet ne nyiitaat rireenet ak ko po myeeindo, Ne ma sip konereechi, ne tinyei chaang'indap rireenetapkei ak imanit.

¹⁶ Weekyage, ak irireena; Igoochi kimnateng'ung' kiboityondeng'ung', Ak isaru weeriitap otwogindeng'ung' ne tye.

¹⁷ Yaiywo kaboorunet ne po myeeindo: Si kogeer che wecho ak kolilaanso, Amu kaitoreta, inyee Kamuktaindet ne Toroor, ak kaigaigaa.