TIENWOGIKAL 84 - BUKUIT NE TILIIL Sireet ne Dutero Kanon

Poiboiyetap Saaet eng' Hekaluut

¹ Korooron ne tya kooriguk, Ee Kamuktaindet ne Toroor ne po lugoosyek!

² Amei emo saboondanyu, ee, machei kotanui agobo seremusyegap Kamuktaindet ne Toroor; Tyenjin muguleldanyu ak poortanyu, Kamuktaindet ne sabei.

³ Kagonyoor chepkelembut koot, Ak kagonyoor kibiswet keswet, ole iichin, Agot eng' kaptisisyosyeguk, ee Kamuktaindet ne Toroor ne po lugoosyek, Laitoryandennyu ak ko Kamuktaindennyu.

⁴ Poiboen icheek che menyei koong'ung': Ilasun kotugul.

⁵ Paibai chii ne mi kimnateennyi eng' inyee; Ineendet ne mi muguleldanyi ortinwek che paroen che pendi Zion.

⁶ Ye punei icheek atebweetap Riirek koyai koek kong'igap peek; Ilaakyin perurwogik ropta ne po tai.

⁷ Pendi kong'etee kimnateet agoi kimnateet, Taagu age tugul eng' taitap Kamuktaindet eng' Zion.

⁸ Ee Kamuktaindet ne Toroor, Kamuktaindet ne po lugoosyek, kas saaennyu, Ep iit, Kamuktaindetap Jakobo.

⁹ Keer, ee Kamuktaindet ne I long'ennyo, Ak igeer togeetap neng'ung' ne iilaat.

¹⁰ Myee peetuut agenge ne atebee seremusyeguk kosiir eliphuut. Achame ariip kurgeetap kootap Kamuktaindennyu, Kosiir ameny emaisyegap kiptengeginik.

¹¹ Amu Kamuktaindet ne po Toroornatet ko uu asiista ak long'eet: Koonu Kamuktaindet ne Toroor myeeindo ak teegisto: Maete icheek che pendoti eng' imanda kiy age tugul ne myee.

¹² Ee Kamuktaindet ne Toroor ne po lugoosyek, Paibai chii ne imang'un.