TIENWOGIKAL 83 - BUKUIT NE TILIIL Sireet ne Dutero Kanon

Soomet kirwookyi Puunigap Israel

¹ Ee Kamuktaindet, amesiis: amesiis, amemuuny, ee Kamuktaindet.

² Amu, keero, poldos puuniguk, ak kagoyot metowekwak icheeget che wechin.

³ Kagotuiyogei si korwooch kirwooget ne ya agobo piiguk, ak ko tetei ng'aalseet agobo cheguuk che ung'ootiin.

⁴ Ki kole icheek, “Obwa, keng'eti si mata koek pororyet: si ma kibwaati kainetap Israel kogeny.”

⁵ Amu kigong'alaaljigei ak kogasyin; Yaei icheek arorutyet si kogirinden:

⁶ Emaisyegap Edom ak Ismaelik; Moab, ak Hagarenik;

⁷ Gebal, ak Ammon, ak Amelek; Philistia, kobooto icheek che menyei Tyro:

⁸ Kanamgei agine Assyria kobooto icheek; Kogotoret lagogap Lot.

⁹ Yachi icheek ko uu ye ki iyachi Midian; Ko uu ye ki iyachi Sisera, ak Jabin, eng' aineet Kison:

¹⁰ Che ki pekyi En-dor; Ki ek ng'atateek che po ng'wony.

¹¹ Yachi piikwak che taagunotiin kogergeit ak Oreb ak Seeb; Ee, yachi pounikwak tugul kogergeit ak Seba ak Salmuna:

¹² Che ki mwa kole, ongenam kobunjech Meng'otosyegap Kamuktaindet.

¹³ Ee Kamuktaindennyu, yai icheek koek temburyek che arureni; Ko uu meteteek che ibei usoonet.

¹⁴ Ko uu maat ne peelei timiin, Ak ko uu liplibenet ne peelei tuloonook;

¹⁵ Oon icheek anyun eng' kipchurchuryeng'ung', Ak imu icheek eng' usooneng'ung' ne kiim.

¹⁶ Inyiit teweernateet togoochikwak; Si kobiit kocheeng' kaineng'ung', ee Kamuktaindet ne Toroor.

¹⁷ Ingolilanso ak koiyweis koigeny; Ee, ingoteweerogis ak kolusyo:

¹⁸ Si kobiit konai kole inyeendet inyegei ne kaineng'ung' ko Kamuktaindet ne Toroor, Inyee ko ii Ne Toroor Miising' ne pou ng'wony komugul.