TIENWOGIKAL 80 - BUKUIT NE TILIIL Sireet ne Dutero Kanon

Saaet agobo Kaweegunetap Israel

¹ Ep iit, ee Mestowotap Israel, Inyee ne indochini Joseph ko uu akweetap keechiirek; Iluu, inyee ne itebee kerubisyek.

² Ing'eet kimnateng'ung' eng' taitap Ephraim, ak Benjamin, ak Manasseh, ak inyoo isarwech.

³ Ee Kamuktaindet, weektech kogeny; ak ingokweng'is togeng'ung', si kesarwech.

⁴ Ee Kamuktaindet ne po Toroornatet ne po lugoosyek, inereekyini saaetap piiguk kot kotyanit?

⁵ Ki ibae icheek amitwogigap peegap kong', ak ki inage peegap kong' koee eng' kerutyet ne oo.

⁶ Iyaech keegu che moitoseech pororyosyek che neegiteenech: ak roritos puunikyok icheegei eng' icheegei.

⁷ Ee Kamuktaindet ne po lugoosyek, weektech; Ak ingokweng'is togeng'ung', si kesarwech.

⁸ Ki ibu inyee sabibuk eng' Misiri: ki ioon pororyosyek, ak imin sabibunooto.

⁹ Kisip ichopchi poroindo, Ak ki pa ng'wony oriit tigitikyik, ak koyom emet.

¹⁰ Ki iuur urwennyi tuloonook, Ak ki kergei mooriikyik ak taragonigap Kamuktaindet.

¹¹ Ki iwaakta mooriikyik kot koit nyanjetap Mediterenian, Ak kong'atos che ng'orng'or kot koit aineet.

¹² Amu nee si ibut ng'otonokyik, Si kobut age tugul ne siirtoi logoekyik?

¹³ Ng'emei icheek toret ne punu timiin, Ak koamei tyong'igap warenget.

¹⁴ Kisaain, acheek ee Kamuktaindet ne po lugoosyek, keele, iweege: Keer oli eng' kipsengwet, ak igeer, ak irutoochi sabibuniito,

¹⁵ Ak keetit ne ki imiine eung'ung' ne po tai, Ak temeet ne ki igimityige.

¹⁶ Kigebeel eng' maat, ak kigeep: Lustos eng' kereetap kong' ne po togeng'ung'.

¹⁷ Ingotebee eung'ung' chiitap eung'ung' ne po tai, Eng' weeriitap chii ne ki igimityige.

¹⁸ Si ma kegetyinige let kemetoin: Isoobech, si keguur kaineng'ung'.

¹⁹ Ee Kamuktaindet ne po Toroornatet ne po lugoosyek, weektech kogeny; Ingokweng'is togeng'ung', si kesarwech.