TIENWOGIKAL 8 - BUKUIT NE TILIIL Sireet ne Dutero Kanon

Ooindap Kamuktaindet ne Toroor ak teegistap chiito

Po ne oo eng' putiik; eng' kibugandet ne po Gitit. Tyendap Kalasunet ne po Daudi

¹ Ee Kamuktaindet ne Toroor, Kiptaiyandennyo, konyitot ne tya kaineng'ung' eng' ng'wony komugul! Ki inde telunateng'ung' kipsengwet.

² Ki ing'at kimnateet kobun kutusweegap lagok ak che reritos, ki inde irimeet amu puuniguk, si iger kong' puunyoot kosiis ak ne yaaktoi mugetuut.

³ Ye ageere kipsengwetisyeguk, poisyonigap euneguk, arawet ak kecheik che ki ichop,

⁴ ale, nee chii anyun, ne tos ibwaat, anan weeriitap chii, ne tos irutoochi?

⁵ Ki iyai ineendet koming'init kitigin eng' Kamuktaindet, ak ilaakyi ineendet kuutweet ne po toroornatet ak teegisto.

⁶ Ki igoochi ineendet koboi poisyonigap euneguk; ki inde tuguuk tugul keldebesaigap keelyekyik kogas iit:

⁷ keechiirek tugul ak tuuga tugul, ak tyong'ik che po timiin;

⁸ toriitik che mi parak, njireenik che po nyanjet, ak alak tugul che pendote ortinwegap nyanjosyek.

⁹ Ee Kamuktaindet ne Toroor, Kiptaiyandennyo, konyitot ne tya kaineng'ung' eng' ng'wony komugul!