TIENWOGIKAL 79 - BUKUIT NE TILIIL Sireet ne Dutero Kanon

Soometap Riirge agobo Jerusalem

¹ Ee Kamuktaindet, kagomong'ji poroteng'ung' pororyosyek; Kagomurwon hekalung'ung' ne tiliil; Kagoyai Jerusalem koegunoot karurugutik.

² Kigogoochi muuswegap kiboitiniguk toriitigap parak koam, Ki igoochi tyong'igap timiin koam poorwegap piiguk che tiliileen.

³ Kitumjinot Jerusalem korotiigap piiguk ko uu peek; Ak ki ma piit chii ne kitup icheek.

⁴ Kigeegu che iteweerotin eng' piik che neegiteenech, Saseech ak kororechinech anyun, che mi komoswekyok tugul.

⁵ Ee Kamuktaindet ne Toroor, tyanitu, tos inereechi agoi? Tos lalei ng'etkondang'ung' ko uu maat?

⁶ Rong'ji nereegeguk pororyosyek che ma ingenin, Ak laitornatosyek che maguurei kaineng'ung'.

⁷ Amu kigoam Jakobo, Ak ki koyai koek karaita ole menyei.

⁸ Amebwaat iityech tengekwogigap kwanisyekyok: Ingosip kondoenech rireenosyeguk: Amu kigenyeratitu miising'.

⁹ Toretech, ee Kamuktaindetap yetunennyo, amu toroornatetap kaineng'ung'; Sarwech, ak iunde tengekwogikyok, amu kaineng'ung'.

¹⁰ Amu nee si koleen pororyosyek, Mi ano Kamuktaindennywa? Ingonaak eng' pororyosyek eng' tainnyo Yaaktaetap korotiik che po kiboitiniguk che ki kitumda.

¹¹ Ingonyo taing'ung' tigenetap kimonjororyot; Riip inyee eng' ooindap kimnateng'ung' che kagitoorchi meet;

¹² Ak iyaakyi pororyosyek che neegiteenech konyil tisap eng' tegetikwak Kerennywa po kong', ne kigerin kong', inyee, ee Kiptaiyat.

¹³ Ak acheek anyun, che ki piiguk ak keechiiregap akweeng'ung', Kemwaun kongoi koigeny: Ak kimwaitoi kalasuneng'ung' eng' ibinwek tugul.