TIENWOGIKAL 78 - BUKUIT NE TILIIL Sireet ne Dutero Kanon

Myeeindap Kamuktaindet agobo Israel

¹ Oepchi iit ng'atuutyennyu, ee piikyuk: Otokyi itiikwok ng'aleegap kutinnyu.

² Ayaate kutinnyu eng' kalewenet; Amwae ng'aleek che ung'ootiin che po keny:

³ Che kigegas ak kenai, Ak ki komwaiwech kwanisyekyok.

⁴ Ma kiung'e chooto lagokwak, Kimwachini ibinda ne nyoonei kalasunoigap Kamuktaindet ne Toroor, Ak kimnateennyi, ak kwang'utikyik che ki koyai.

⁵ Amu ki igimit paornateet eng' Jakobo, Ak ki inde ng'atuutyet eng' Israel, Ne ki ng'at kwanisyekyok, kole, Konet lagokwak:

⁶ Si konai chooto ibinda ne piitu, agot lagok che tuun kisichei; Che tuun ng'eetos ak komwachi lagokwak:

⁷ Si konde kamang'unennywa eng' Kamuktaindet, Si ma utye poisyonigap Kamuktaindet, Ago si koriip ng'atuutikyik:

⁸ Ak si ma tuun igei kwanisyekwak, Ibinda ne uui met ak ko ngelelyo; Ibinda ne ki ma chop mugulelwekwak, Ak che ki ma litititu saboonwekwak eng' Kamuktaindet.

⁹ Kiweektagei let lagogap Ephraim eng' peetuutap lugeet, Kotinyei kariik ak koiboti kwangok.

¹⁰ Ki ma riip kayomisetap Kamuktaindet, Ak ki eesyo kobendatee ng'atuutyennyi:

¹¹ Ak kiutye tuguukyik che kiga yai, Ak kwang'utikyik che kiga koboorchi icheek.

¹² Ki yai ineendet tuguuk che po kwong'eet eng' taitap kwanisyekwak, Eng' emetap Misiri, eng' tembwetap Zoan.

¹³ Kipcheune aeng' nyanjet, ak kogoochi kolandae; Ak ki igoochi peek kototenso konamgei.

¹⁴ Ki indochi eng' pooldet peet, Ak ki indochi kemout komugul eng' lapkeiyetap maat.

¹⁵ Kitui rwandosyek eng' surkwen, Ak ki inaga peek che chaang' ko uu che punu rirosyek.

¹⁶ Ki imang'une rwandet peek che rootei, Ak ki igoochi peek kosururgei ko uu ainoosyek.

¹⁷ Ago kites icheek koyachi ineendet tengekto, kongelelji Ineendet Ne Toroor Miising' eng' emet ne yaamaat.

¹⁸ Ak kityem Kamuktaindet eng' mugulelwekwak Eng' soometap amitwogik eng' kasennywa po myat.

¹⁹ Ee, kichaam Kamuktaindet; Ki le, Tos imuuchi Kamuktaindet kochobwech amitwogik eng' surkwen?

²⁰ Ogeero, kikwer ineendet rwandet, ak kisururgei peek, Konyi ainoosyek kot kong'irtagei; Tos imuuchi kogoonech magatiinik ak icheek? Anan imuuchi kogoonech panyeek?

²¹ Ki kas Kamuktaindet ne Toroor anyun, ak kinereech: Ak ki lal maat agobo Jakobo, Ak kitogosta nereegek agobo Israel;

²² Amu ki ma iyan pichooto Kamuktaindet, Ama imang' yetunennyi.

²³ Ago ki ng'at poolik eng' parak, Ak ki yaat kurgotigap kipsengwet,

²⁴ Ak kiroong'ji mana si koam, Ak ki igoochi peegap kipsengwet.

²⁵ Ki am piik amitwogigap che kiimeen: Ki iyookyi amitwogik kobiyong'so.

²⁶ Ki igoochi usoonetap kong'asiis kous eng' kipsengwet: Ak ki indochi usoonet ne po murot tai eng' kimnateennyi.

²⁷ Kiroong'ji icheek panyeek che tee temburyek, Ak toriitik che po kebebaik che tee ng'aniegap nyanjosyek:

²⁸ Ak ki igoochi kobutyi kwenutap nganasennywa, Komoswek tugul che po meng'otosyekwak.

²⁹ Ki amis anyun, ak kibiyong'so kot; Ak ki igoochi che kigasei myat.

³⁰ Ago ki ma igeskei magennywa, Ak ye kita komi panyeek kutusweekwak,

³¹ Konyonji eng' yooto nereegegap Kamuktaindet, Ak kobar che neryootiin alak eng' icheek, Ak kokwer neranigap Israel kobar.

³² Agot nganda kinyoor chooto tugul ko kita koyai tengekto, Ak ki ma iyan poisyonikyik che po kwong'eet.

³³ Ki iwong' anyun peetuusyekwak kobetyo puch, Ak kenyiisyekwak eng' kamuiset.

³⁴ Ye kingo par icheek, kocheeng' anyun icheek ineendet: Ak ki week kocheeng' Kamuktaindet eng' kagiiletapkei.

³⁵ Ki ibwaat icheek kole Kamuktaindet ko rwandennywa, ak kole katyagindennywa Kamuktaindet Ne Toroor Miising'.

³⁶ Ago ki iberber ineendet eng' kutusweekwak, Ak komwachi lembechek eng' ng'elyebwekwak.

³⁷ Amu ki ma ko lititen mugulelwekwak eng' ineendet, Ak ki ma ek che kiyani agobo kayomisennyi.

³⁸ Ago kinyochi kaat tengektonywa amu ki nyiitaat ineendet rireenetapkei, ak ki ma par icheek: Ee, kiweekta nereegekyik konyil che chaang', Ama ing'eet nereegekyik tugul.

³⁹ Ak ki ibwaat kole icheeget ko poorto kityo: Usoonet ne siirtoi, ama weeksei kogeny.

⁴⁰ Ak kingelelji ineendet konyil ata eng' surkwen, Ak ki igoochi arageneet eng' surkwen!

⁴¹ Ak ki week kogeny kotyem Kamuktaindet, Ak kitach Ineendet ne Tiliil ne po Israel.

⁴² Ma ibwaat eunnyi, Anan peetuut ne ki ityaach icheek eng' puunyoot.

⁴³ Ko uu ye ki yai kaboorunoikyik eng' Misiri, Ak kwang'utikyik eng' tembwetap Zoan;

⁴⁴ Ak ki wal peegap ainoosyekwak koek korotiik, Agot kereruusyek ak icheek, kot koma ko eeoksei.

⁴⁵ Ki iyookto kalyang'ik koba kwenunnywa, che kisus icheek; Ak mororochik che king'em icheek.

⁴⁶ Ak ki igoochi koam tinapchet ruratennywa, Ak ki igoochi chereng'endet koam poisyonikwak.

⁴⁷ King'eme koigap ropta sabibukwak, Ak king'eme chepkoset mogoonikwak.

⁴⁸ Ak kibiree koiyat tuukwak, Ak ki am ilet akweennywa po keechiir.

⁴⁹ Ki wiirchi icheek koroomnatetap nereegekyik, Nereegek, ng'wanindo ak nyalilda, Ak ki iyookyi kweanetap malaikaisyek che ibei yaityet.

⁵⁰ Ki yachi nereegekyik ooreet; Ak ki ma riiree saboonwekwak eng' meet, Ago ki igoochi saboonwekwak koroito:

⁵¹ Ak ki par kiboretook tugul eng' Misiri, Ki par taunetap kimnateennywa eng' emaisyegap Ham:

⁵² Ago ki indochi piikyik ko uu keechiirek, Ak ki imut ko uu akweetap keechiirek eng' surkwen.

⁵³ Ki indochi eng' kaalyeet, si ma iyweis: Ago ki tuch nyanjet puunikwak.

⁵⁴ Ak ki imut agoi koit kiwotetap oldanyi ole-tiliil, Agoi tulwooni, ne kiga ale eunnyi ne po tai.

⁵⁵ Ki oon pororyosyek eng' tainnywa, Ak kipchechi icheek emonooto eng' kiwotosyek koek porotennywa, Ak ki igoochi ortinwegap Israel komeny emaisyekwak.

⁵⁶ Ago kityem ak kongelelji Kamuktaindet Ne Toroor Miising', ak ki ma riip paornatosyekyik.

⁵⁷ Ak kiweektagei let, koosup ng'aalseet ko uu kwanisyekwak: Ki kiweekta koba taban ko uu kwanget ne ma litit.

⁵⁸ Kitach ineendet kot konereech eng' oldinwekwak che sutotin, Ak ki igoochi ineendet ng'etkonda eng' kanamonikwak che ki kiwai.

⁵⁹ Ye kingo kas Kamuktaindet niito konereech, Ak kiwech Israel miising':

⁶⁰ Ak kimeto anyun Hekaluut ne ki mi Shiloh, Emait ne ki inde kwenutap piik;

⁶¹ Ak ki igoito kimnateennyi keluul, Ak ki inde karaaranindanyi eutap puunyoot.

⁶² Ki igoito piikyik ak icheek kebare rotwetap chok; Ak ki nereekyi porotennyi.

⁶³ Ki par maat weeriikwak; Ama kityenji tiibiikwak tyendap katunisyet.

⁶⁴ Ki kibare tisiikwak rotwetap chok; Ak ki ma iteiyo mosoogikwak.

⁶⁵ Ki ng'eet anyun Kiptaiyat ko uu ne karuei, Ko uu chiito ne kiim ne parori amu maiyek.

⁶⁶ Ak ki parat puunikyik koweektagei let: Ak ki igoochi kolilaanso agoi.

⁶⁷ Ak ki eesyo emaitap Joseph, Ak ki ma lewen ooreetap Ephraim;

⁶⁸ Ago ki lewen ooreetap Judah, Tulweetap Zion ne ki cham.

⁶⁹ Ak ki teech oldanyi ne tiliil koigei ole sutot, Koigei ng'wonyut ne kigogimiit ineendet koigeny.

⁷⁰ Ki lewen Daudi agine kiboityondennyi, Ak ki imutune piusyegap keechiirek:

⁷¹ Ye ki isubu keechiirek che aboen, Ki imut ineendet si kobiit kobai kap Jakobo che piikyik, ak Israel che porotennyi.

⁷² Kibai anyun icheek ko uu kagesunatetapkei ne po muguleldanyi; Ak ki indochi eng' utaatyetap eunekyik.