TIENWOGIKAL 77 - BUKUIT NE TILIIL Sireet ne Dutero Kanon

Poisyonigap Kamuktaindet che eechen

¹ Ariirchini Kamuktaindet; Ee, ariirchini Kamuktaindet eng' kutinnyu, si koepcha iit.

² Ki acheeng' Kiptaiyat eng' peetuutap nyalildanyu: Ki aiite eunnyu kemoi, ama amuuny; Ki eesyo saboondanyu kigaigai.

³ Abwaati Kamuktaindet, ak atigeni: Abwaatoti, ak kotanui saboondanyu.

⁴ Iname konyekyuk kogos: Aiimigei kot koma muuchi ang'alaal.

⁵ Koabwaat peetuusyek che po keny. Kenyiisyek che ki kobunji keny miising'.

⁶ Abwaati tyendanyu kemoi: Ang'alaali ak muguleldanyu; Ak kogosyach saboondanyu eng' kagiiletapkei.

⁷ Tos toortaisyei Kiptaiyat agoi? Tos mata kobaibait kogeny?

⁸ Tos ki kogeskei rireenennyi koigeny? Tos ma kosuldoi arorutyennyi koigeny?

⁹ Tos kigoutye Kamuktaindet rireenennyi? Anan ki kogeer nereegekyik rireenennyi ne tala?

¹⁰ Ak ki ale, kaimennyu niito; abwaati ale ki kowalak euut ne po tai ne po Ineendet Ne Toroor Miising'.

¹¹ Abwaati poisyonigap Kamuktaindet ne Toroor; Ak abwaati kwang'utiguk che po keny.

¹² Abwaatoti agine tuguuk che ki iyai, Ak ang'alaalote poisyoniguk.

¹³ Ee Kamuktaindet, mi oreng'ung' ole-tiliil: Ng'oo kamuktain ne oo ne kergei ak Kiptaiyat?

¹⁴ Inyeendet Kamuktaindet ne iyae kwang'utik: Ki ibarte kimnateng'ung' eng' kwenutap pororyosyek.

¹⁵ Ki ityaach piiguk eng' eung'ung', Weeriigap Jakobo ak Joseph.

¹⁶ Kigeerin peek, ee Kamuktaindet; Kigeerin peek ak ki iyweis: Kibotanso ak icheek rirosyek.

¹⁷ Kirong' poolik peek; Kibiitune cheet parak: Ak ki iyeesta kipchaboniguk.

¹⁸ Ki mi tuugeetap tuleeng'ung' kipchurchuryet; ki ikweny ng'wony `kalyelosyek: ki potan ng'wony ak kotumdumgei.

¹⁹ Ki mi oreng'ung' nyanjet, Ak kimi ortinweguk peek che kiimeen, Ak ki ma naak tyegutiguk.

²⁰ Ki imut piiguk ko uu akweetap keechiirek, Eng' eutap Musa ak Aron.