TIENWOGIKAL 75 - BUKUIT NE TILIIL Sireet ne Dutero Kanon

Kamuktaindet ne irwoochi

¹ Kiweegun kongoi, ee Kamuktaindet; kiweegun kongoi, amu neegit kaineng'ung': mwaitoi piik kwang'utiguk.

² Ye kanyooru poroindo ne choboot, arwooch eng' imanda.

³ Kigochoot ng'wony kobooto chechiik tugul che menyei olooto, ki alum tolochikyik.

⁴ Ki aleenji che mendos, Amomenie: Ak ki aleenji che yaacheen, Amotoroor kuineng'wong':

⁵ Amotoroor miising' kuineng'wong'; Among'alaal eng' menoteet.

⁶ Amu ma punu katorooret kong'asiis, anan cherongo, Ama punu murot tai.

⁷ Ago kirwoogindet Kamuktaindet: Iming'ini age, ak koeeti age.

⁸ Amu miitei kigombet eutap Kamuktaindet ne Toroor, ak kuutu divaik; Ak ki kiburuch che chaang' che teerchiin, ak korong'u ineendet chooto: Iman, irurunyi misigiikwak kiptengeginik tugul che po ng'wony ak koeei.

⁹ Ago amwaitoi anee koigeny, Atyenjini kalasunoik Kamuktaindetap Jakobo.

¹⁰ Atile kuinoigap kiptengeginik; Ago eegitu kuinoigap che po imanda.