TIENWOGIKAL 73 - BUKUIT NE TILIIL Sireet ne Dutero Kanon

KITABUUT NE PO SOMOK (T.Kal 73-89) Soomet agobo toreteet kegirinda Usiik

¹ Iman, myee Kamuktaindet eng' Israel, eng' icheeget che tiliileen mugulelwek.

² Ago eng' anee ko ki neegit komasta keelyekyuk; ki neegit kochabaita kakwautikyuk.

³ Amu ki ama ng'etkong' agobo che mendos, ye kinga keer kaalyeetap kiptengeginik.

⁴ Amu ma nyooru ng'wanindo; chamegei poorwekwak, ak ko kiimeen.

⁵ Ma tinyei icheeget nyalilwogik ko uu piik alak; Ama nyooru pireet ko uu piik alak.

⁶ Eng' nooto anyun uu menoteet sirimdo ne mi kaatwekwak; katuch icheek koroomnateet ko uu ngoryeet.

⁷ Ibwanotin konyekwak eng' nerateet: tinyei tuguuk che siirei che machei mugulelwekwak.

⁸ Chotisyei, ak mwaei sastaet eng' tengekto: ng'alaaldos eng' katorooretapkei.

⁹ Kigotoroor kutusweekwak agobo kipsengwet, ak kobendote ng'elyebwekwak ng'wony.

¹⁰ Eng' nooto anyun, weeksei piikyik oli: ak lugui icheek peek che nyiitootiin.

¹¹ Ak koleen icheek, “Nae nee Kamuktaindet? Tos miitei naet eng' Ineendet Ne Toroor Miising'?”

¹² Ogeero, kiptengeginik chuuto; miitei icheeget kotugul eng' kaalyeet; tesoksei eng' mogornatosyek.

¹³ Iman ki atiliil muguleldanyu puch, Ak ki aune eunekyuk libwobindo puch;

¹⁴ Amu kaanyooru pireet eng' peetuut komugul, Ak kitigoono karonet age tugul.

¹⁵ Nda ki kamwa ale ang'alaali ko uu ni, Keero, ta kiga aberber ibindap lagoguk.

¹⁶ Ye kinga cheeng' ole amuuchi anaita niito, Kotemena;

¹⁷ Agoi among'ji kap Kamuktaindet ole-tiliil, Anai anyun ole poochin kagesunennywa.

¹⁸ Iman igoochini kotebee icheek komoswek che chaboen: Ak iwiirchini icheek ng'wony koba ng'emisyet.

¹⁹ Katepto ano kot kosip kong'emogis icheek eng' chokyinet; kagowong'kei eng' kamuisosyek.

²⁰ Uu karwotitoet ye kagos chiito; Ko uu nooto, ee Kiptaiyat, ye ing'eet inyee, isase itoondanywa.

²¹ King'wanit muguleldanyu, Ak ki kitoor saboondanyu:

²² Ki aa abusat, amangen kiy; ki auu tyondo eng' taing'ung'.

²³ Agot nga uu nooto ami kobooten kotugul: Ki inam eunnyu ne po tai.

²⁴ Inyee ne indoiywa eng' ruchineng'ung', Ak eng' let itaacha anyo ye mi liilindo.

²⁵ Ng'oo ne atinye eng' kipsengwet ne ma inyee? Ama mi age ne amache eng' ng'wony kosiirin.

²⁶ Ichuchui poortanyu ak muguleldanyu: Ago Kamuktaindet kimnateetap muguleldanyu ak kebebertanyu koigeny.

²⁷ Amu keero, petos icheeget che looen eng' inyee: Amu ki ing'em icheek tugul che ki isup ibeetapkei koistoenengei.

²⁸ Ago myee eng' anee ariikyi Kamuktaindet: Ki acham koek Kiptaiyat Kamuktaindet ne Toroor ole amwechini, Si kobiit amwaita poisyoniguk tugul.