TIENWOGIKAL 72 - BUKUIT NE TILIIL Sireet ne Dutero Kanon

Saaet agobo toreteet koityi Laitoryat

¹ Ee Kamuktaindet, igoochi laitoryat kirwoogutiguk, Ak igoochi imandang'ung' weeriitap laitoryat.

² Irwookyin piiguk eng' imanda, Ak kobesyechi kibananoguk.

³ Ipchin tuloonook piiguk kaalyeet, Ak ipchin tuloonook che mengeechen piiguk imanda.

⁴ Irwooksechin kibananogap piik, Ak kosaru lagogap che nyalildos, Ak kotonaton usiindet.

⁵ Iywein icheek kota komi asiista, Ak kotee komi arawet, eng' ibinwek tugul.

⁶ Chorugei ineendet ko uu ropta ne choorchingei malelyet: Ko uu ropta ne inesyin ng'wony.

⁷ Eng' peetuusyekyik konyooru ne po imanda perurto; Ak chaang'indap kaalyeet agoi koma komi arawet.

⁸ Laitorani ineendet kobooch nyanjet agoi nyanjet age, Ak kobooch aineet agoi ole poochin ng'wony.

⁹ Ing'uruukyin ineendet icheek che menyei surkwen; Ak komel temburyek puunikyik.

¹⁰ Ibu kagoochinoik laitorinigap Tarsus ak che po ngeguusyek; Igoitoi kagoochinoik laitorinigap Sheba ak Seba.

¹¹ Ee, ibutyin keelyekyik laitorinik tugul: Otei ineendet pororyosyek tugul.

¹² Amu saru ne nyalili ye kariir; Ak kibananiat, ne ma tinyei toretin.

¹³ Riire kibananiat ak ne nyalili, Ak kosaru saboonwegap che nyalildos.

¹⁴ Ityachi saboonwekwak eng' usiisyet ak koroomnateet; Ak punjin kamanuut korotiikwak eng' tainnyi:

¹⁵ Ak saptos icheek; ak kigoochi ineendet thahabu ne po Sheba: Ak saaei piik kotugul agobo ineendet; Iberuuri ineendet peetuut komugul.

¹⁶ Ak tuun piitu chaang'indap peek eng' ng'wony eng' tuloonook parak; Ak itumdumegei logoekyik ko uu Lebanon: Ak tunendos icheek che po nganaseet ko uu susweek che po ng'wony.

¹⁷ Tebyei kainennyi koigeny; Tebyei kainennyi kota komi asiista: Ak kiberuuri piik eng' ineendet; Ak kuure pororyosyek tugul ne paibai.

¹⁸ Iberuurot Kamuktaindet ne po Toroornatet, Kamuktaindetap Israel, Ne ineegei ne yaei tuguuk che po kwong'eet:

¹⁹ Ak iberuurot kainennyi ne tinyei toroornatet agoi koigeny; Ak ingonyi ng'wony komugul toroornatennyi. Amen, ak Amen.

²⁰ Kagogeskei saautigap Daudi weeriitap Jesse.