TIENWOGIKAL 71 - BUKUIT NE TILIIL Sireet ne Dutero Kanon

Saaetap Chii ne oos

¹ Amang'un, ee Kamuktaindet ne Toroor, amegoono alilan agoi.

² Sarwo eng' imandang'ung', ak ieta; epcha iit ak isarwo.

³ Egu eng' anee rwandet ne amenye, ole awendi kotugul: Ki igoonu ng'atuutyet kosarwo; Amu ii rwandennyu, ak ko ii irimennyu.

⁴ Koono achilil, ee Kamuktaindennyu, eng' eutap kiptengekyot, eng' eutap chiito ne ma po imanda, ak ne kolgol.

⁵ Amu inyee ne ageniin, ee Kiptaiyat Kamuktaindet ne Toroor, Ii kamang'unennyu kobooch ko aa ming'in.

⁶ Ki atienengei kong'etee ko kagisicho; Inyee ne ki imoong'wa eng' moetap iyoonyu ne kisicho. Neng'ung' kalasunennyu kotugul.

⁷ Auu kwang'utyet eng' che chaang'; ago inyee ko ii ole amwechini ne kiim.

⁸ Nyiei kutinnyu kalasuneng'ung', kobooto teegistang'ung' peetuut komugul.

⁹ Amewiirta ye tuun kaaositu; amebagaaktaa ye kagobet kimnateennyu.

¹⁰ Amu ng'alaalena puunikyuk; ak irwoochi icheek che sapchin saboondanyu,

¹¹ leen icheek, “Ki kobagaakta `Kamuktaindet ineendet; oon ak onam ineendet; amu ma mi ne saru.”

¹² Ee Kamuktaindet, amelooena: Ee, Kamuktaindennyu, chogu toreto.

¹³ Ingolilanso ak kobetyo che puunigap saboondanyu; Ingotuch icheek rosyinet ak teweernateet che cheeng'ei koyaiywo ne ya.

¹⁴ Ago amang'u kotugul, Ak atese alasun kosiir.

¹⁵ Mwaitoi kutinnyu imandang'ung', Ak yetuneng'ung' peetuut komugul; Amu mangen ole tee chooto.

¹⁶ Anyoone kobooto poisyonik che kiimeen che po Kiptaiyat Kamuktaindet ne Toroor: Amwae imandang'ung', ne neng'ung' inyegei.

¹⁷ Ee Kamuktaindet, ki ineeta kobooch ko aa ming'in; ak ki amwaite agoi nguno poisyoniguk che po kwong'eet.

¹⁸ Ee, ye tuun kaaositu, asich kalwalek, ko mebagaakta, ee Kamuktaindet; agoi amwachi kimnateng'ung' ibinda ne nyoonei, amwachi kamuktaeng'ung' age tugul ne piitu.

¹⁹ Toroor agine imandang'ung' miising', ee Kamuktaindet; Inyee ne ki iyai tuguuk che eecheen, Ee Kamuktaindet, ng'oo ne ogerge?

²⁰ Inyee ne ki iboorwech nyalilwogik che chaang' che koroomen, ta isoobech kogeny, Ak tuun imoong'wech kemang'une oriit miising' ne po ng'wony.

²¹ Tes etunatennyu, Ak iweeige kogeny igaigaa.

²² Alasun agane eng' kibugandet, agobo imandang'ung', ee Kamuktaindennyu; atyenun kalasunoik eng' ketubet, ee Inyee ne Tiliil ne po Israel.

²³ Paibaitu kutinnyu miising' ye atyenun kalasunoik; Ak paibaitu saboondanyu, ne ki ityaach inyee.

²⁴ Ng'alaali ng'elyeptanyu agobo imandang'ung' peetuut komugul: Amu ililandos, ak koteweeroksei, icheek che cheeng'jino yaityet.