TIENWOGIKAL 7 - BUKUIT NE TILIIL Sireet ne Dutero Kanon

Saaetap chii ne kinyaliili

Tyendo ne po Daudi agobo ng'aleegap Kush ne po ooreetap Benjamin.

¹ Ee Kamuktaindet ne Toroor, Kamuktaindennyu, inyee ne amang'un; sarwo eng' icheek tugul che onwo, ak ieta.

² Si ma kereer saboondanyu ko uu ng'etundo, si ma tonaton, ama mi chii ne sarwo.

³ Ee Kamuktaindet ne Toroor, Kamuktaindennyu, ngo ki ayai ni, ngo mi tengek eunekyuk,

⁴ ngo ki ayaakyi yaityo ne ki kimi tuwai eng' kaalyeet, anan ki arebee kiy punyondennyu ko mangen,

⁵ ko ingoon anyun puunyoot saboondanyu kot konam; ingotyekyi ng'wony saboondanyu, ak konde temburyek teegistanyu.

⁶ Ng'eet, ee Kamuktaindet ne Toroor, eng' nereegeguk, tonon kirinde koroomnatetap nereegegap puunikyuk. Ng'eet, ee Kamuktaindet, ki ing'at kirwooget.

⁷ Ingoyiemin tuiyetap pororyosyek, ak iweege parak ibou icheek.

⁸ Ibesyechin `Kamuktaindet ne Toroor pororyosyek; irwookseiywa, ee Kamuktaindet ne Toroor ko uu imandanyu, ak ko uu kagesunatennyu pogei.

⁹ Ingowong'kei tengektap kiptengeginik, ago igimit ne po imanda. Ee Kamuktaindet ne po imanda, inyee ne isyachi kabwaatutik ak mugulelwek.

¹⁰ Long'ennyu Kamuktaindet, ne saru che po iman eng' mugulelwek.

¹¹ Kamuktaindet ko kirwoogindet ne po iman, Kamuktaindet ne nereekyin kiptengeginik kotugul.

¹² Ngot ko masik chii, kolitei Kamuktaindet rotwennyi po chok; kagoriich ak kong'i kwangennyi.

¹³ Ki kochop kariikyik che kiimeen, yaei kipchabonikyik che po maat.

¹⁴ Ogeero ole manaktoi `icheek yaityet, ee, kogomanach yaityet, ak kosich lembeita.

¹⁵ Kogochop keriinget, kot kobal, kogobutyi keriingonooto kobaalei.

¹⁶ Weekyingei metinnyi yaityennyi; ak kobutyi paragutap metinnyi koroomnatennyi.

¹⁷ Aweekyini Kamuktaindet ne Toroor kongoi ko uu imandanyi; ak atyenjini kalasunet kainetap Kamuktaindet ne Toroor, Ineendet Ne Toroor Miising'.