TIENWOGIKAL 69 - BUKUIT NE TILIIL Sireet ne Dutero Kanon

Soomet kochogune Kamuktaindet toreteet

¹ Sarwo, ee Kamuktaindet; amu kagoityon peek che mache komaluucha kaatit.

² Karorokyi ng'atatyat ne oo, ama mi ole ketonone; kaitu ye mi rireetap peek, ole katucha maranosyek.

³ Koang'et eng' riirekyuk; kagoyaam moktanyu: Kago imenitu konyekyuk ye ta ageni Kamuktaindennyu.

⁴ Chaang' kosiir suumeekyuk che wecho puch; Kiimeen puunikyuk che mwaei lembech che machei kobara: Ak ki agoite chooto che ki ma arebee chii.

⁵ Ee Kamuktaindet, ingen inyee perberindanyu; Ak ma ung'ootiin tengekwogikyuk eng' inyee.

⁶ Ee Kiptaiyat Kamuktaindet ne Toroor ne po lugoosyek, amat kolilaanso che igenin amu anee: Ee Kamuktaindet ne po Israel, amat koteweerogis agobo anee icheeget che cheeng'in.

⁷ Amu ki aegu ne kirosyin agobo inyee: Ki kotuch togeennyu kalilanet.

⁸ Ki aegu too eng' che kitupche, ak ki aegu kipsagarin eng' lagogap chebyoset ne kisicha.

⁹ Amu ki ama ng'etkondap koong'ung'; Ak ki kobwonjo rosyinetap icheeget che rosyinin.

¹⁰ Ak ye ki ariire, aming'init saboondanyu eng' karugutetapkei, ko kirosya icheek agobo nooto.

¹¹ Ye ki alaagoti kuniet, aegu kalewenet eng' icheek.

¹² Ng'alaali agobo anee che tebyei eng' ormariich; Ak ki aegu tyendap kibogitinik.

¹³ Ago anee, asaain, ee Kamuktaindet ne Toroor, eng' peetuut ne chamaksei: Ee Kamuktaindet, eng' chaang'indap rireeneng'ung', Wolwo eng' imandap yetuneng'ung'.

¹⁴ Sarwo eng' ng'atatyat, si ma lugua: meto achilil eng' icheeget che wecho, ak eng' rireetap peek.

¹⁵ Amengosuta mogoochek, ak amengolugua rireet; amengoger kutinnyi keriinget kota ami oriit.

¹⁶ Wolwo Kamuktaindet ne Toroor, amu myee chamyeng'ung' ne tala: Iweekyage ko uu chaang'indap rireenosyeguk.

¹⁷ Ak ameung'e togeng'ung' kiboityondeng'ung'; Chokyi wolwo, amu ami tiritindo.

¹⁸ Rikyi saboondanyu, ak ityaach: Sarwo amu puunikyuk.

¹⁹ Ingen rosyinet ne kirosyina, ak kalilanennyu, ak teweernatennyu: Miitei taing'ung' puunikyuk tugul.

²⁰ Kogoiri muguleldanyu rosyinet; ak aa rumot: Ak ki agen che tinyei rireenet, ago ki ma piit; Ak che imuuchi kogaigai chii, ago ma anyooru.

²¹ Ki koono tuguuk che ng'woneen koek amitwogik; Ak ye ki ama melel konaga siki aee.

²² Ingoek mesteet meesennywa ne mi tainnywa; Ak ingoek mesteet ye mi icheek eng' kaalyeet.

²³ Ingoimenitu konyekwak, si ma keer kiy; Ak igoochi kobotanso suenutikwak kotugul.

²⁴ Rong'ji icheek nyitateng'ung', Ak ingonam icheek koroomindap nereegeguk,

²⁵ Ingoguber ole menyei; Amat komeny chii emaisyekwak.

²⁶ Amu usei icheek ineendet ne ki ibir; Ak komwaoti agobo arageneetap icheek che ki iguoten.

²⁷ Tesyi tengekto age tengektonywa: Ak amat kobwonji icheek imandang'ung'.

²⁸ Ingibukto icheek eng' bukuitap saboon, Amat kesir kobooto che po imanda.

²⁹ Ago aa kibananiat ak atinye arageneet: Ingotoroora yetuneng'ung', ee Kamuktaindet.

³⁰ Alasu kainetap Kamuktaindet eng' tyendo, Ak amwae kongoi atoroori ineendet.

³¹ Ak kobaibai nooto Kamuktaindet ne Toroor kosiir eito, Anan kirgit ne tinyei kuinoik ak siyok.

³² Kagogeer che talaen, ak kogaskei: Ingosapcho mugulelwekwok, okweek che ocheeng'e Kamuktaindet.

³³ Amu kasei Kamuktaindet ne Toroor che ponondos, Ak masasei kimonjororinikyik.

³⁴ Ingolas ineendet kipsengwet ak ng'wony, Nyanjosyek, ak tuguuk tugul che pendote olooto.

³⁵ Amu saru Kamuktaindet Zion, ak koteech nganasoogap Judah; Ak komeny icheek olooto, kobunji.

³⁶ Nyabani ak icheek kesweegap otwogikyik olooto, ak komeny olooto icheek che chamei kainennyi.