TIENWOGIKAL 68 - BUKUIT NE TILIIL Sireet ne Dutero Kanon

Kalasunet ak mwaetap Kongoi

¹ Ingong'eet Kamuktaindet, ingoiyesta puunikyik; Ak ingomwei eng' tainnyi che wechei ineendet.

² Iyeste icheek ko uu ye kiyestoi iyeto: Ko uu ye chootei temeniet eng' ye neegitee maat, Ko uu nooto ingolusyo kiptengeginik eng' taitap Kamuktaindet.

³ Ago ingoboiboitu che po imanda; ingogaskei eng' taitap Kamuktaindet: Ee, ingoboiboitu eng' kagasetapkei.

⁴ Otyenji Kamuktaindet, olasu kainennyi; ochopchi ooreet ne oo ineendet ne punei ong'atosyek, ko uu ne laanyei paraisiit. Kainennyi ko Kamuktaindet ne Toroor; ak ogaaskei eng' tainnyi.

⁵ Kwandap che ma tinyei sigiik, ak ne tononjin mosoogik, Ko Kamuktaindet eng' koonnyi ne tiliil.

⁶ Igoochin Kamuktaindet che mi icheegei komeng'jin ak alak: Imutyin kimonjororinik poroteet: Ago menyei pistoik emet ne yaamaat.

⁷ Ee Kamuktaindet, ye kinga imande indoe piiguk, Ye kiityegoti surkwen,

⁸ Kobotan ng'wony, Ak kororok kipsengwet eng' taitap Kamuktaindet: Kobotan Sinai nooto eng' taitap Kamuktaindet, Kamuktaindetap Israel.

⁹ Ee Kamuktaindet, ki iyoogu ropta ne oo, ak ki igimit poroteng'ung' ye ki tinyei ng'etatet.

¹⁰ Ki meny olooto tuiyeng'ung'; ee Kamuktaindet, ki ichopchi che po myeeindong'ung' kibananook.

¹¹ Igoitoi Kiptaiyat ng'olyoot: Oo lugeetap kobogorisyek che mwaitoi ng'aleek.

¹² Mweei laitorinigap lugoosyek, mweei: Ak kopchei kwondo ne ng'etu eng' kaa parunenik,

¹³ Agot ngirue piusyegap keechiirek, ko uu kebebaigap cheptuget ne ki kituge fedha, Ak koroorikyik che ki kiile thahabu che talelyonen.

¹⁴ Ye ki iyeesta Ne po Kamuktaet laitorinik eng' olooto, Ko ki uu ye ibuti teluji eng' Salmon.

¹⁵ Tulweetap Kamuktaindet ko tulweetap Bashan; Tinyei tulweetap Bashan walisyek che kooen.

¹⁶ Amu nee si koamak ng'etkong', okweek tuloonook che kooen, Agobo tulweet ne ki komach Kamuktaindet komeny? Ee, menyei Kamuktaindet ne Toroor olooto koigeny.

¹⁷ Karisyegap Kamuktaindet ko eliphuusyek tiptem, agot eliphuusyek ak eliphuusyek: Mi Kiptaiyat kwenunnywa, eng' Sinai, eng' Ole-Tiliil.

¹⁸ Ki itogoste parak, ki imut luulenik che ki iluul; Ki itaach piik koek kagoochinoik, Ee, agot ngelelik ak icheek, si kobiit komeng'iis Kamuktaindet ne Toroor.

¹⁹ Iberuurot Kiptaiyat, ne ibei peetuut age tugul milennyo, Kamuktaindet ineendet ko yetunennyo.

²⁰ Kamuktaindet eng' acheek ko Kamuktaindet ne po saruunet; po Kiptaiyat Kamuktaindet ortinwek che kechilile eng' meet.

²¹ Ago tuei Kamuktaindet metowegap puunikyik, Metitap chiito ne wendote tengektanyi.

²² Ki le Kiptaiyat, Amutu kogeny eng' Bashan, Amutu kogeny komang'une rirosyegap nyanjet:

²³ Si kobiit irooch keeldong'ung' korotiik, Si konyoor ng'elyeptap seseniguk kebebertanyi eng' puunik.

²⁴ Ki kogeer icheek panweguk, ee Kamuktaindet, Panwegap Kamuktaindennyu, Laitoryandennyu, agoi ole-tiliil.

²⁵ Ki indo tyeniik, ak ki isubu che kibutei kibugandinik, kimi kween kootap Kor che kibirei sugutisyek che mengeechen.

²⁶ Olasu Kamuktaindet eng' tuiyosyek, Olasu Kiptaiyat, che ko po kondametutap Israel.

²⁷ Miitei Benjamin ne ming'in, pounindennywa, Miitei pounigap Judah ak tuiyennywa, Pounigap Zebulun, pounigap Naphtali.

²⁸ Ki kong'at Kamuktaindeng'ung' kimnateng'ung': Igimiit, ee Kamuktaindet, nooto ne ki iyai agobo acheek.

²⁹ Ibun laitorinik kagoochinoik Amu hekalung'ung' eng' Jerusalem.

³⁰ Kergong' tyondap timiin ne mi mutweek, Chaang'indap kiruugik, ak moegap piik, Koming'inonugei age tugul koibu fedha; Kigoiyesta `ineendet piik che chamei pooryeet.

³¹ Tuun mang'une pounik Misiri; Iyogoochin Kush eunekyik Kamuktaindet kochokyin.

³² Otyenji Kamuktaindet, okweek laitornatosyegap ng'wony; Otyenji Kiptaiyat kalasunoik;

³³ Ineendet ne laanyei kipsengwetisyegap kipsengwet, chooto po keny; Ogeero, twegu eng' kutinnyi, kutit ne kiim.

³⁴ Ingobunji kimnateet Kamuktaindet: Mi telunatennyi Israel, Ak mi kimnateennyi paragusyek.

³⁵ Ee Kamuktaindet, kiywein eng' oldinweguk che tiliileen: Kamuktaindetap Israel, ne igoochin piikyik kimnateet ak kamuktaet. Iberuurot Kamuktaindet.