TIENWOGIKAL 66 - BUKUIT NE TILIIL Sireet ne Dutero Kanon

Kalasunet agobo Myeeindap Kamuktaindet

¹ Otyenji Kamuktaindet eng' poiboiyet, ng'wony komugul:

² Otyen toroornatetap kainennyi; Otoroor kalasunennyi.

³ Oleenji Kamuktaindet, Po kamuiset ne tya poisyoniguk! Iming'injiningei puuniguk amu etunatetap kimnateng'ung'.

⁴ Tuun ilasun ng'wony komugul, Ak kotyenun; Tyenjin kaineng'ung'.

⁵ Obwa, ogeer poisyonigap Kamuktaindet; Po kamuiset poisyonik che yachin ineendet weeriigap piik.

⁶ Ki wol nyanjet koek emet ne yaamaat: Kilandae aineet kobunei keelyek. Ki kiboiboitu eng' ineendet eng' olooto.

⁷ Laitorani koigeny eng' kamuktaennyi; Keerei konyekyik pororyosyek: Amat koeetkei ngelelik.

⁸ Olasu Kamuktaindennyo, okweek piik, Ak ongogasak kutitap kalasunennyi:

⁹ Ne riibei saboonwekyok kosapcho, Ak ne ma chamdoi keisto keelyekyok.

¹⁰ Ee Kamuktaindet, kiityemech inyee: Ki ityemech, ko uu ye kityeme maat fedha.

¹¹ Ki imutyech mesteet ne uu regereiywot; Ki iratyi suenutikyok nyalilda ne oo.

¹² Ki igoochi piik kotyech metowekyok; Ki kibun maat ak peek; Ago ki imutwech kebwa ole tunenot.

¹³ Anyoone koong'ung' aibu kagoochinoik che kibeelei, Ayaagun tuguuk che ki aaroorun,

¹⁴ Chooto che ki mwa ng'elyeptanyu, ak che ki komwa kutinnyu, ye ki ami nyalilda.

¹⁵ Ago kagoochinoik che kibeelei che akwaen, Kobooto nyamdutigap mengichik; Agoitoi kiruugik kobooto kwesik.

¹⁶ Obwa, ogas, okweek tugul che oiywei Kamuktaindet, Si amwaita tuguuk che ki yachi saboondanyu.

¹⁷ Ki ariirchi eng' kutinnyu, Ak ki alasu ineendet eng' ng'elyeptanyu.

¹⁸ Ye abwaat tengekto eng' muguleldanyu, koma kaswa Kiptaiyat.

¹⁹ Ago iman kogogas Kamuktaindet; ki koepchi iit tweguunetap saaennyu.

²⁰ Iberuurot Kamuktaindet, ne ki ma timda saaennyu, ak ki ma istoena rireenennyi.