TIENWOGIKAL 65 - BUKUIT NE TILIIL Sireet ne Dutero Kanon

Kilasu Kamuktaindet ne iakwai ng'wony

Po ne oo eng' putiik. Tyendap Kalasunet ne po Daudi. Tyendo

¹ Ee Kamuktaindet, igenin kalasunet eng' Zion, ak keyaei che ki kiarorun.

² Ee inyee ne kasei saaet, pwonjinin piik tugul.

³ Katemena tengekwogik, inyee ne iundoi pistaosyekyok.

⁴ Paibai miising' chiito ne ileweni, ak imuti koriikyin, Si kobiit komeny seremusyeguk: Ak kebiye myeeindap koong'ung', Ole tiliil eng' hekalung'ung'.

⁵ Ak iwolwech eng' imanda eng' tuguuk che imuisei, Ee Kamuktaindetap yetunennyo; Inyee ko ii kamang'unetap komoswek tugul che po ng'wony, Ak ne po icheek che mi nyanjet ne loo:

⁶ Ne iuuiiti tuloonook eng' kimnateennyi; Ak korategei eng' kamuktaet:

⁷ Ne igoochin tuleetap nyanjosyek kosiis, tuleetap peek che mildogei, Ak polatetap piik.

⁸ Ak koiyweisyei che menyei ole loo miising' amu kaboorunoiguk: Igoochini koboiboitu ole charunee asiis ak ole roroktoe.

⁹ Irutochini ng'wony, ak inagi peek, Ak iakwai miising'; Nyiitaat peek aineetap Kamuktaindet: Ichopchini piik peek, ko kaichop ng'wony.

¹⁰ Inyiiti peek ole kigereer eng' ng'wony, komarane; Iripribi komoswekyik che sutotin: Itangusi eng' ropta ne inesi; Iberuuri tuguukyik che piitos.

¹¹ Inyiiti kenyiit myeeindong'ung'; Ak sau akwaiyet eng' ortinweguk.

¹² Sachin chooto kewosyegap surkwen: Ak kirate tuloonook poiboiyet.

¹³ Nyiitootiin kewosyek keechiirek; Ak nyiitootiin peek atebwosyek; Igasegei amu poiboi ak kotyendos.