TIENWOGIKAL 63 - BUKUIT NE TILIIL Sireet ne Dutero Kanon

Amei melel saboondannyun agobo Kamuktaindennyu

Tyendap Kalasunet ne po Daudi, ye ki miitei surkwen ne po Judah

¹ Ee Kamuktaindet, inyee ko ii Kamuktaindennyu; acheeng'in eng' kagiiletapkei; Amei melelda saboondanyu amu machin, machin kot poortanyu, eng' emet ne yaamaat ne po ng'etatet, ole ma mi peek.

² Ara uu nooto koageerin eng' ole-tiliil, si ageer kimnateng'ung' ak toroornateng'ung'.

³ Amu myee chamyeng'ung' ne tala kosiir saboondo; ilasun anyun kutinnyu.

⁴ Ara anyun alasun kota asabe; anamjini parak eunekyuk amu kaineng'ung'.

⁵ Piyonyi saboondanyu eng' igoorto ak akwaiyet; ak ilasun kutinnyu eng' poiboiyet,

⁶ ye abwaatin ami itogunnyu, ak abwaatin eng' saisyegap kemoi;

⁷ amu ki iegu toretindennyu, abaibai anyun eng' urwetap kebebaiguk.

⁸ Isubotin saboondanyu miising'; nama eung'ung' ne po tai.

⁹ Ago pendi ng'wony oriit, che cheeng'ei kong'em saboondanyu.

¹⁰ Kigoitoi kobek eng' kimnateetap rotwetap chok, ak kobunji lelwek.

¹¹ Ago paibai laitoryat eng' Kamuktaindet; igasegei age tugul ne iyastos eng' ineendet; amu kigerei kutusweegap kiplembechonik.