TIENWOGIKAL 62 - BUKUIT NE TILIIL Sireet ne Dutero Kanon

Kamuktaindet ko riibindenyu

Po ne oo eng' putiik: ko uu ye kityeni Jeduthun. Tyendap Kalasunet ne po Daudi.

¹ Igeni Kamuktaindet kityo saboondanyu, punu yetunennyu ineendet.

² Ineendet ineegei rwandennyu ak yetunennyu, ineendet ko irimennyu ne kooi; ma ki istoa miising'.

³ Opookyini chii kot kotyanit, ole si kobiit obar ineendet, okweek tugul, ko uu inaatut ne kogoimom, ak ko uu ng'ootweet ne neegit koluul?

⁴ Irwoochi kityo komachei kotoorta ineendet amu telunatennyi; poiboi eng' lembechek. Iberuuri eng' kutusweekwak, ago sasisyei eng' mugulelwekwak.

⁵ Ee saboondanyu, igen Kamuktaindet kityo; amu punu kamang'unennyu ineendet.

⁶ Ineendet ineegei rwandennyu ak yetunennyu, irimennyu ne kooi ineendet; ma ki istoa.

⁷ Tinyei Kamuktaindet yetunennyu ak toroornatennyu; rwandetap kimnateennyu ak ole amwechini ko Kamuktaindet.

⁸ Ee okweek pichu, omang'u ineendet kotugul; oroong'ji mugulelwekwok ineendet, Kamuktaindet ole kemwechini.

⁹ Iman puch piik che nyerootiin, ak kiplembechonik piik che taagunotiin. Ma ing'eeti kiit ne kigeeree nyigiisindo, wisisen icheek tugul kosiir kabuuset.

¹⁰ Amomang'u sastaet, amomene rebisyet; ngo tesak mogornatosyek ko mat otiegei.

¹¹ Kitwek Kamuktaindet konyil agenge, ki agas nooto konyil aeng': ale po kimnateet Kamuktaindet;

¹² Ee Kiptaiyat, neng'ung' rireenet agine; amu inyee ne iyaakyini chii tugul ko uu poisyennyi.