TIENWOGIKAL 60 - BUKUIT NE TILIIL Sireet ne Dutero Kanon

Saaet agobo toreteet

Po ne oo eng' putiik: Tyendap kalasunet ne po Daudi, ne ineetisye; ye kibortos Daudi ak Aram-naharaim ak Aram-soba, ak ki weigei Joab ak kobar piik eliphuusyek taman ak aeng' che po Edom eng' Atebweetap Munyuk.

¹ Ee Kamuktaindet, ki iwiirtech ak ki iyestech; ki inereech; ee iweechech kogeny.

² Ki itumdum emet ak ki ibet; isoop ole ki kobetak amu potani.

³ Ki iboorchi piiguk tuguuk che nyigiisen; ki igoonech kee divaik che kibogiti.

⁴ Ki igoochi che iywein songolyet, si kobiit kobarta amu imanda.

⁵ Si kesar chamaniguk, saru eng' eung'ung' ne po tai ak iwolwech.

⁶ Kigotwek Kamuktaindet eng' tiliilindanyi; kole, “Agasigei ye apchee Shekem, ak akwaa atebweetap Sukoth.

⁷ Nenyu Gilead, ak nenyu Manasseh; Ephraim agine ko kimnateetap metinnyu, Judah ko kiroktonyu ne po laitornatet.

⁸ Moab ko karait ne aunegei; awirchini kweiyonnyu Edom. ooren inyee Philistia amu anee.”

⁹ Imuta ng'oo awo nganaseet ne kiim? Indoiywa ng'oo agoi Edom?

¹⁰ Tos ma inyee ne ki iwiirtech, ee Kamuktaindet? Ama iwe inyee kobooto lugosyekyok, ee Kamuktaindet.

¹¹ Koonech toreteet kegirindae puunyoot, amu ma tilei kiy toretetap chii.

¹² Kiterteerisyei eng' nyiganateet eng' Kamuktaindet, amu ineendet ne tyekyin ng'wony puunikyok.