TIENWOGIKAL 6 - BUKUIT NE TILIIL Sireet ne Dutero Kanon

Kesoom rireenet ye mi nyalilda

Po ne oo eng' putiik; eng' kibugandinik che po inoik ne kibutei eng' kebeberta ne po sisiit. Tyendap Kalasunet ne po Daudi

¹ Ee Kamuktaindet ne Toroor, megera kong' eng' nereegeguk, anan itigoono eng' nyitateng'ung' ne ng'waan.

² Rireena, ee Kamuktaindet ne Toroor, amu aa nyalulat; ee Kamuktaindet ne Toroor, isooba, amu nyalildos kawekyuk.

³ Nyalili agine saboondanyu miising', ee inyee Kamuktaindet ne Toroor, tyanitu?

⁴ Iweege, ee Kamuktaindet ne Toroor, saru saboondanyu; sarwo amu chamyeng'ung' ne tala.

⁵ Ma mi chii ne ibwaatin eng' ye mi meet. Mwaun ng'oo kongoi eng' ye mi che ki kobek?

⁶ Kaang'et eng' tigenoikyuk; marane peegap kong' itogunnyu kemout age tugul; sachin peekyuk po kong' ole arue.

⁷ Machei kong'emogis konyekyuk amu arageneet; kagoosegitu amu puunikyuk tugul.

⁸ Oistoenage, okweek tugul yaigap tengekto! Amu kagogas Kamuktaindet ne Toroor tuugeetap riirekyuk.

⁹ Kagogas Kamuktaindet ne Toroor soomsennyu; taachei Kamuktaindet ne Toroor saaennyu.

¹⁰ Ililandos puunikyuk tugul ak konyalildos miising'; weechegei let ak kolilaanso eng' yooto.