TIENWOGIKAL 59 - BUKUIT NE TILIIL Sireet ne Dutero Kanon

Saaet kesoom Kamuktaindet ne Toroor riipseet

Po ne oo eng' putiik: “Amat ing'em!” Tyendap Kalasunet ne po Daudi, ye ki iyooktoi Saulo riibiik koriip kootap Daudi kole si kobar ineendet.

¹ Ee Kamuktaindennyu, sarwo eng' puunikyuk; ieeta asiir icheek che ng'eetyina.

² Sarwo eng' yaigap tengekto, ak isarwo eng' piik che chamei kotumda korotiik.

³ Amu, keero, ratei icheek ooreet agobo saboondanyu; kagoyumjagei che kiimeen. Ma amu pistoennyu, anan tengektonyu, ee Kamuktaindet ne Toroor,

⁴ rwaei icheek kochobegei ma amu lelutyennyu. Ng'eet inyee, toreto, ak igeer!

⁵ Inyee, ee Kamuktaindet ne Toroor, Kamuktaindetap lugoosyek, Kamuktaindetap Israel, ng'eet ibookyi pororyosyek; amat iriiree pistoik alak tugul che yaach.

⁶ Weeksei icheek koskoleny, ikwari ko uu seset, ak pendi koyiemei nganaseet.

⁷ Keero, ing'irugei ng'aleek eng' kutusweekwak; miitei rotonik kutusweekwak. Amu mwaei kole, “Ng'oo ne kasei?”

⁸ Ago irorechini inyee Kamuktaindet ne Toroor; ireenye pororyosyek.

⁹ Ee kimnateennyu, ageniin; amu inyee Kamuktaindet, ko irimennyu ne kooi.

¹⁰ Indoena Kamuktaindennyu ne po rireenet, tuun chamwo Kamuktaindet ageer magennyu eng' puunikyuk.

¹¹ Amebar icheek, si ma utye piikyuk; iyeste pichooto eng' kimnateng'ung', ak ichooru, ee Kiptaiyat long'ennyo.

¹² Ingenam icheek eng' menatennywa, amu tengektap kutusweekwak, ak ng'aleegap ng'elyebwekwak, amu chubisyet ak lembechek che mwaei.

¹³ Iwong'u icheek eng' nereegek, iwong'u anyun, kot koma komi! Si konai piik kole pounisyei Kamuktaindet eng' Jakobo, agoi ole poochin ng'wony.

¹⁴ Ingoweechkei icheek koskoleny, ingokwaryo ko uu seset, ak ingoba koyiem nganaseet.

¹⁵ Ombenoti kocheeng'oti amitwogik, ak kong'unyng'ung'so kemout komugul ngo ma piyong'so.

¹⁶ Ago atyeni agobo kimnateng'ung'; atyeni agobo rireeneng'ung' karon. Amu inyee ko ki ii irimennyu ne kooi, ak ole amwechini eng' peetuutap pichiindo.

¹⁷ Ee kimnateennyu, atyenun inyee kalasunoik; amu inyee, Kamuktaindet, ko irimennyu ne kooi, Kamuktaindet ne irireenage.