TIENWOGIKAL 58 - BUKUIT NE TILIIL Sireet ne Dutero Kanon

Saaet agobo yaktaetap mugetuut

Po ne oo eng' putiik; Amat ing'em. Tyendap Kalasunet ne po Daudi: Konorwet ne po ung'oot

¹ Tos omwae imanda okweek pounik? Tos orwookyini eng' imanda weeriigap piik?

² Oyae yaitwogik eng' mugulelwekwok; ak oyachini ng'wony koroomnateet eng' eunekwok.

³ Petyotiin kiptengeginik kobooch komi moo, mastoi ak komwaei lembechek kobooch ko kagisich.

⁴ Ng'wonennywa ko uu ng'wonetap ndaret; kergei icheek ak ereneet ne ma kastoi, ne timei itiikyik,

⁵ ne ma epchin iit kutitap piik che kuurei erenook eng' kagaigaet, matiny kaguur eng' ng'omnateet.

⁶ Ee Kamuktaindet, iri kelekwak, icheru, ee Kamuktaindet ne Toroor, kelek che eecheen che po ng'etuunyik che neran!

⁷ Ingochootyo koigei peek che rootei; ingoigei icheek susweek che kityekyin ng'wony ak kotonogis.

⁸ Ingoigei kimng'elyegut ne chootei kowong'ugei, ingoigei kwondo ne karorok moet, ne ma keer asiis.

⁹ Kotom kogas tereenikwok maatap katok, Istoi ineendet icheek eng' kipchurchuryet, che tuonen ak che laldos kogergeit.

¹⁰ Paibai ne po imanda ye keerei yaaktaetap mugetuut; iune keelyekyik korotiigap kiptengeginik.

¹¹ Si komwa piik kole, “Miitei iman melekto ne po chiito ne po imanda; mi iman Kamuktaindet ne irwoochi eng' ng'wony.”