TIENWOGIKAL 56 - BUKUIT NE TILIIL Sireet ne Dutero Kanon

Imang'u Kamuktaindet eng' nyalilda

Po ne oo eng' Putiik: kityeni eng' tuugeetap cheptuget ne miitei timdo eng' ole loo. Tyendap Kalasunet ne po Daudi: Konorwet ne po ung'oot: ye ki luul Philistik ineendet eng' Gath.

¹ Rireena, ee Kamuktaindet, amu ibookya piik; inyalila, kousa peet komugul.

² Ibookya puunikyuk eng' peetuut komugul; chaang' che poryeno eng' menoteet.

³ Ee Kamuktaindet Ne Toroor Miising', ye aiyweisyei, amang'un.

⁴ Eng' Kamuktaindet, ne alasu ng'olyoondennyi; Kamuktaindet ne amang'u, ma yweisyei. Imuuchi ko itaa nee chii?

⁵ Walei ng'aleekyuk koyaagitu peet komugul; tokyino yaityet eng' kabwaatutikwak.

⁶ Iyumigei ak kounyegei, riiboti kakwautikyuk, ko uu ye kigosetyi saboondanyu.

⁷ Tos chililso eng' tengekto? Iluul piik eng' nereegeguk, ee Kamuktaindet.

⁸ Iiti ombenennyu; inde peekyuk po kong' soteng'ung'. Tos ma mi chooto bukuing'ung'?

⁹ Weekyigei let puunikyuk eng' peetuut ne aguursei. Angen niito ale, mi Kamuktaindet komostanyu.

¹⁰ Amang'u Kamuktaindet ak alasu ng'olyoondennyi. Amang'u Kamuktaindet ne Toroor ak alasu ng'olyoondennyi.

¹¹ Kamuktaindet ne amang'u, ma yweisyei. Tos imuuchi koita nee chii?

¹² Miitei paragunnyu kayosyautiguk, ee Kamuktaindet; agoonin inyee konunoigap kongoi.

¹³ Amu ki isaru saboondanyu eng' meet, ak keelyekyuk si ma put, si awendotee taitap Kamuktaindet eng' lapkeiyetap saboondo.