TIENWOGIKAL 55 - BUKUIT NE TILIIL Sireet ne Dutero Kanon

Saaetap Chii ne kinyaliili

Po ne oo eng' Putiik; eng' kibugandinik che po inoik. Kaneetisyet ne po Daudi

¹ Epchi iit saaennyu, ee Kamuktaindet; ameung'egei soomsennyu.

² Kaswa, ak iwolwoo; aiimigei amamuunyi eng' kabwaatutikyuk.

³ Atigeni agobo polateetap puunyoot, amu suryetap kiptengekyot. Inyalilo icheek che yae tengekto, ak wecho eng' nereegek.

⁴ Tinyei ng'wanindo ne oo muguleldanyu; ak kagobutya kamuisosyegap meet.

⁵ Kago pwanjo kaiyweisyet ak potanet, ak kagotucha arageneet.

⁶ Ak ki ale, “Pwo! Nda kaa tinye kebebaik ko uu cheptuget! Ta kaa tiriren ak awe amuuny;

⁷ iman, ta ki awe ole loo, ak ameny surkwen.

⁸ Ta ki asip amwechi ole aung'egei eng' usoonet ne koroom ak kipchurchuryet.”

⁹ Ng'em, ee Kiptaiyat, ak itoiye ng'elyebwekwak; amu koageer koroomnateet ak pooryeet eng' nganaseet.

¹⁰ Yiemei irimosyek peet ak kemoi; mi kwenutap nganaseet tengekto ak wasetapkei.

¹¹ Mi ng'emisyet kwenunnyi; suryet ak ng'aalseet koma istoegei ortinwekyik.

¹² Amu ki ma ko puunyoot ne kirosya, nda ki puunyoot ta ki amuitoi; nda ineendet ne kiwecha ne ki ilasunenogei, ta ki aung'egei ineendet.

¹³ Ago ki inyee ne ki aechine, chorwennyu, ak ne kingenge.

¹⁴ Ki king'alaaljige eng' ng'aleek che anyiny, ak ki kibe kootap Kamuktaindet ne Toroor kobooto tuiyet.

¹⁵ Ingoche meet icheek, ak ingororokyi keriinget kosaptos; amu miitei yaitwogik kooriikwak ak kwenunnywa.

¹⁶ Ago aguure anee Kamuktaindet; ak kosarwo Kamuktaindet ne Toroor.

¹⁷ Atigeni ak ariire, koskoleny, ak karon, ak peet kween, si kogas ineendet kutinnyu.

¹⁸ Ityachi saboondanyu eng' kaalyeet eng' lugeet ne ki machei kogirindaa, amu ki chaang' icheek che kibeligei.

¹⁹ Kamuktaindet, ineendet ne ki laitorani kobooch keny, ko kasei, ak kowolji icheek, piik che ma walaksei, ama konyiti Kamuktaindet.

²⁰ Ki koiito eunekyik kole konam chorwennyi, ki kosamis kayomisennyi.

²¹ Ng'aleekyik ko korooron kosiir mwaitap cheego, ago muguleldanyi ko tetaat lugeet. Tangusen ng'aleekyik kosiir mwaita, ago ki rotoogap chok che kaging'us.

²² Ituuchi Kamuktaindet ne Toroor nyigiisindang'ung', si kotiin; ma koi cham ineendet keisto ne po imanda.

²³ Ago inyee, ee Kamuktaindet, irorogu icheeget koba keriingetap ng'emisyet, rumiik ak ng'aalik ma tarei icheek kebebertap peetuusyekwak. Ago anee amang'un inyee.