TIENWOGIKAL 54 - BUKUIT NE TILIIL Sireet ne Dutero Kanon

Kesaa agobo Saruunet eng' Puunik

Po ne oo ne po Putiik; eng' kibugandinik che po inoik. Kaneetisyetap Daudi: ye ki pwa Sipaik ak koleenji Saul, “Unyegei Daudi eng' kwenunnyo.”

¹ Sarwo, ee Kamuktaindet, eng' kaineng'ung', ak ibesyeiwo eng' kimnateng'ung'.

² Kas saaennyu, ee Kamuktaindet; epchi iit ng'aleegap kutinnyu.

³ Amu kang'eetya toek che machei kogirinda, amu kogocheeng' icheek che koroomen saboondanyu; ma cham icheek konde Kamuktaindet tainnywa.

⁴ Ogeero, toretindennyu Kamuktaindet; Kiptaiyat ko riibiindetap saboondanyu.

⁵ Yaakyin `inee yaityet puunikyuk; eng' imaning'ung', ing'em icheek.

⁶ Agoonin korosyot ne po chamyet; aweechi kongoi, ee Kamuktaindet ne Toroor, amu myee niito.

⁷ Amu ki kosarwo eng' nyalilda tugul; ak kogeer konyekyuk kiit ne ki amache eng' puunikyuk.