TIENWOGIKAL 53 - BUKUIT NE TILIIL Sireet ne Dutero Kanon

Chii ne ma iywei Kamuktaindet

Po ne oo eng' Putiik; ne ki kichopchi kaneetisyetap Daudi.

¹ Mwaei che perber eng' mugulelwekwak kole, “Ma mi Kamuktaindet.” Ng'emotin icheek, yaei poisyonik che kiwechei; ma mi ne yaei ne myee.

² Ing'ururi Kamuktaindet eng' kipsengwet weeriigap piik, kole kogeer ngo mi ne utaat, ne cheeng'ei Kamuktaindet.

³ Ki koweektagei let age tugul eng' icheek; kigosamisitu tugul; ma mi ne yaei ne myee, achicha, ma mi agot agenge.

⁴ Tos ma tinyei naet yaigap yaityo, che amei piikyuk ko uu ye amei amitwogik, ama kuurei Kamuktaindet?

⁵ Tebee icheek arageneet ne oo eng' olooto, eng' arageneet ne tomo kobiitu. Isersere `Kamuktaindet kawegap ineendet ne setyinin; ki koochin icheek kolilaanso, amu ki koeesyo `Kamuktaindet icheek.

⁶ Kita myee nda kiga pun yetunetap Israel `Zion! Ye tuun weech Kamuktaindet ole uu piikyik, ko poiboitu anyun Jakobo; ak kogaskei Israel.