TIENWOGIKAL 52 - BUKUIT NE TILIIL Sireet ne Dutero Kanon

Karwookyinet ne po lembeita

Po ne oo eng' Putiik. Kaneetisyetap Daudi: ye ki nyo Doeg Edomindet ak komwachi Saul koleenji “Kagoit Daudi kootap Ahimelek.”

¹ Amu nee si ilasuge eng' yaityet, ee inyee chii ne koroom, agobo yaityet ne kiyachin che iywei Kamuktaindet? Peetuut komugul ko

² chobei ng'elyeptang'ung' tengekto. Kergei ng'elyeptang'ung' ak rotweet ne ng'atip, poisyei eng' ng'aalseet.

³ Ichame yaityet kosiir ne myee; ak ichame lembech kosiir ye imwae imanda.

⁴ Ichame ng'aleek tugul che ng'emei piich, ee inyee, ng'elyepta ne ng'aalsei.

⁵ Ng'emin Kamuktaindet ko uu nooto koigeny, istoin, ak kong'usun eng' meng'ooteng'ung', ak kotutin eng' emetap che saptos.

⁶ Keerei che po imanda, ak koywei, ak kororechi ineendet kole,

⁷ “Ogeero, niito chiito ne ki ma cham koek kimnateennyi Kamuktaindet; ago ki imang' chaang'indap mogornatosyekyik, ak ki igimitkei eng' tengektanyi.”

⁸ Ago anee, agergeitu ak mseituni ne tuon ne piitei eng' kootap Kamuktaindet. Amang'u rireenetap Kamuktaindet koigeny ak koigeny.

⁹ Aweegun kongoi agoi, amu che ki iyai inyee. Eng' taitap piiguk che po iman amwaitoi kaineng'ung', amu myee niito.