TIENWOGIKAL 51 - BUKUIT NE TILIIL Sireet ne Dutero Kanon

Saaet agobo katiliilet ak nyoetap kaat

Po ne oo eng' Putiik. Tyendap Kalasunet ne po Daudi: ye kinyonji Nathan maotyot, ye kingo kagoipkei ak Bathsheba

¹ Rirenage, ee Kamuktaindet, ko uu chamyeng'ung' ne tala; tindiny pistoennyu ko uu chaang'indap rireenosyeguk.

² Iundoena inne tengektonyu, ak itiliilo eng' ng'oogistonyu.

³ Amu ang'aanye pistautikyuk; ak mi tainnyu ng'oogistonyu kotugul.

⁴ Ki ayaun tengekto inyeendet inyegei, ak ki ayai ne ya eng' taing'ung'. Ki ityin imanda ye ing'alaali, ak kotook lititindang'ung' ye irwoochi.

⁵ Keero, ki kisikta tengekto; ak kimanakta kamennyu chalwok.

⁶ Keero, imache imanit eng' kebeberwek che po oriit; ko uu nooto ineeta utaatyet eng' ole ung'aat.

⁷ Iunena husop, si atiliilit; iuna, si atiliilit kosiir teluji.

⁸ Koono agas kagasetapkei ak poiboiyet; si koboiboitu kawek che ki iri.

⁹ Ung'e togeng'ung' ng'oogiswekyuk, ak itindiny tengekwogikyuk tugul.

¹⁰ Yaiywo muguleldo ne tiliil, ee Kamuktaindet; ak iyai saboondanyu koleelit ak iywokyi eng' oriit.

¹¹ Ametortaa eng' ole imi; ameistoena Kabuuseng'ung' ne Tiliil.

¹² Weekwa poiboiyetap yetuneng'ung'; ak inama atonon eng' muguleldo ne chamei.

¹³ Yeityo aneet anyun pistoik ortinweguk; ak koweekyingei kiptengeginik.

¹⁴ Sarwo eng' ng'oogistap korotiik, ee Kamuktaindet, inyee Kamuktaindetap yetunennyu, ak kotyen kogasak kutinnyu agobo imandang'ung'.

¹⁵ Yaat kutinnyu, ee Kiptaiyat; ak komwaita kutinnyu kalasuneng'ung'.

¹⁶ Amu mebaibaitune tiseiywot; ta kagoonin. Mebaibaitune agot kagoochinoik che kibeelei.

¹⁷ Korosegap Kamuktaindet ko Kabuuset ne kigoil; ee Kamuktaindet, mesase muguleldo ne kigoil ak kotinyei siguunet.

¹⁸ Yachi ne myee Zion ko uu ye ichame; teech kogeny irimoigap Jerusalem.

¹⁹ Ibaibaitune anyun tiseiywek che po iman, eng' kagoochinet ne kibeelei ak kagoochinet ne kibeelei komugul; igoitoi anyun `icheek kiruugik eng' kaptisisyeng'ung'.