TIENWOGIKAL 50 - BUKUIT NE TILIIL Sireet ne Dutero Kanon

Kagoochinet ne Tagaat

Tyendap Kalasunet ne po Asap

¹ Katwek Ne po Kamuktaet, inee Kamuktaindet ne po Toroornatet, ak kaguur ng'wony kobooch ko kachor asiis agoi kororokto.

² Eng' Zion, komi korooronindo ne ititaat, kamong' Kamuktaindet kooluu.

³ Nyoonei Kamuktaindennyo, ama siisei: mi tainnyi maat ne peelei kowong'u, ak komuut ineendet usoonet ne oo.

⁴ Kuurei `inee parak kipsengwet ak ng'wony, si kobiit korwookyi piikyik:

⁵ “Oyumja piikyuk che tiliileen; chooto che ki kiyomiske ak icheek eng' tiseiywek!”

⁶ Mwaitoi kipsengwet imandanyi; amu Kamuktaindet ineendet ko kirwoogindet.

⁷ Oep iit, ee piikyuk, si ang'alaal; ee Israel, si abaoryanun. Aa Kamuktaindet, Kamuktaindeng'ung'.

⁸ Ma kerin kong' agobo tiseiyweguk; ak mi tainnyu kagoochinoiguk che kebeelei kotugul.

⁹ Ma kwerye tany eng' kaptugung'ung', anan kwesta eng' akwotisyeguk.

¹⁰ Amu nenyu tyony age tugul ne po timiin, ak tuuga che miitei tuloonook eliphuut.

¹¹ Angen toriitik tugul che miitei tuloonook, ak chechuuk tyong'igap warenget.

¹² Nda ama rubeet, koma mwaun, amu nenyu ng'wony, ak tuguukyik che nyiitaat olooto.

¹³ Tos aame panyeegap kirugiguk, anan aee korotiigap ng'oroorek?

¹⁴ Igoochi Kamuktaindet korosyotap kongoi; ak yaakyi Ineendet Ne Toroor Miising' arorutiguk.

¹⁵ Kuura eng' peetuutap nyalilda; asi asaruun, ak iloswa.

¹⁶ Ago leenjin `Kamuktaindet kiptengekyot, atinye imanda nee, si imwaimwae ng'atuutikyuk, ak ing'alaalatee arorutyennyu?

¹⁷ Amu inyee ne iweche atep ne myee, ak ituktochini patai ng'aleekyuk.

¹⁸ Ye ki igeer choorindet, ochamyechi tuwai, ak itinye yamdaet ak che ibegei.

¹⁹ Ichamjini kuting'ung' komwa yaityet, ak chobei ng'elyeptang'ung' ng'aalseet.

²⁰ Itebye ak ichaame ng'eetap kamenng'ung'; itaami weeriitap komet.

²¹ Ki iyai tuguuchuuto ak ki asiis; ki ileen ki kerge ak inyee. Ago agerin kong' nguno, ak atete tugul eng' taing'ung'.

²² “Ara anyun obwaat chuuto, okweek che outye Kamuktaindet, si ma tonak, ama piitu chii ne sarwok.

²³ Age tugul ne igoitoi korosyotap kongoi ko nooto ne iloswa; ak ineendet ne chobei atebeennyi komyee aboorchini yetunetap Kamuktaindet.”