TIENWOGIKAL 5 - BUKUIT NE TILIIL Sireet ne Dutero Kanon

Saaet agobo Saruunet

Ne oo eng' putiik; eng' ndurerusyek. Tyendap Kalasunet ne po Daudi

¹ Epchi iit ng'aleekyuk, ee Kamuktaindet ne Toroor, ruchi kabwaatutikyuk.

² Kas ye atwegu ariire, Laitoryandennyu ak ko Kamuktaindennyu, amu inyee ne asaae.

³ Ee Kamuktaindet ne Toroor, igase kutinnyu karon; atetuun saaennyu karon, ak ageni iwolwoo.

⁴ Ma ii Kamuktaindet ne ibaibaitune yaityo; ama tebee oldang'ung' yaityo.

⁵ Ma tonondos eng' taing'ung' menotik; iweche yaigap yaityet tugul.

⁶ Ing'eme che mwaei lembechek; wechei Kamuktaindet ne Toroor tumdaindetap korotiik ak ng'aaliindet.

⁷ Ago anee, eng' chaang'indap rireeng'ung' pogei, anyoone koong'ung'; eng' kaiyweisyeng'ung' agutunyi atokyinige hekalung'ung' ne tiliil.

⁸ Ee Kamuktaindet ne Toroor, indoiywa eng' imandang'ung', amu puunikyuk che sapchino; ilitiit oreng'ung' eng' tainnyu.

⁹ Ma mi lititindo eng' kutusweekwak; tengek kityo mugulelwekwak. Kererit ne yaataat mookwekwak; ak lasei piich eng' ng'elyebwekwak.

¹⁰ Iityi icheek tengekto, ee Kamuktaindet; ingobutyo icheek eng' kirwoogutikwak. Oon icheek eng' chaang'indap pistoennywa, amu ki ingeleljin.

¹¹ Ago ingoboiboitu icheek tugul che imang'un, Ingotyenso eng' poiboiyet icheek agoi, amu iriibe icheek. Ingoboiboitu ak icheek eng' inyee che chamei kaineng'ung'.

¹² Amu inyee Kamuktaindet ne Toroor iberuuri chiito ne po imanda; iyieme ineendet chamyeng'ung' ko uu long'eet.