TIENWOGIKAL 49 - BUKUIT NE TILIIL Sireet ne Dutero Kanon

Kamang'unetap Magornatosyek

¹ Ogas ni, okweek piik tugul; oep iit, okweek tugul che omenye ng'wony;

² che ma taagunotiin ak che taagunotiin, tuwai, mogoryot ak kibananiat.

³ Ng'alaale kutinnyu utaatyet; po kaguiyet kabwaatutigap muguleldanyu.

⁴ Aepchini iit kalewenet; ak ang'aany mwaennyu ne po ung'oot eng' tyendap ketubet.

⁵ Amu nee si aiyweis eng' peetuusyegap kaimutik, ye yiema tengekto ne po puunikyuk?

⁶ Icheeget che imang'u tuguukwak, ak kolasunegei chaang'indap mogornatosyekwak.

⁷ Ma mi eng' icheek ne imuuchi kotyach ng'eetap kamet eng' oor age tugul, ago temenee kogoochi Kamuktaindet kiit ne kityage ineendet;

⁸ amu pichiy kiit ne kityage saboonwekwak, ak kanyool kebagaakta agoi

⁹ si kobiit kosap ineendet agoi, si ma keer ng'emisyet.

¹⁰ Keerei ineendet kole pegu che utaatiin, ak pegu tuwai che perber ak koseng'eng'inik, ak kobagakyi piik alak tuguukwak.

¹¹ Kereeriisyekwak ko kooriikwak koigeny, meng'otosyekwak eng' ibinwek tugul; nganda kuurtoe emotinwekwak kainaikwak.

¹² Ma tebyei chii agoi eng' teegistanyi; uu tyong'ik che pegu.

¹³ Ityin niito che mi perberyo oriinnywa; niito kagesunetap icheeget che chamei tuguuk che piitune ng'alaalutikwak.

¹⁴ Ki kichopchi icheek ye mi meet ko uu keechiirek; egu `meet mestowonnywa. Tetoi icheek kochute kererit; nunei itoondanywa eng' olooto, ak punjin icheeget ye mi meet.

¹⁵ Ago ityaachi `Kamuktaindet saboondanyu komang'une kimnateetap meet, amu taacha inee.

¹⁶ Meiywei ye kagigoochi chii mogornateet, ye katesak konditap koonnyi.

¹⁷ Amu ma ibei kiy ye mee; ma choortagei teegistanyi kosubi ineendet.

¹⁸ Agot nga ki iberuuri saboondanyi ye kita kosabei, ak kolasun piik, ye iyachinigei ne myee,

¹⁹ wendi ibindap kwanisyekyik; ama kogeerei icheek lapkeiyet koigeny.

²⁰ Chiito ne tinyei teegisto, ama tinyei ng'omnateet ko kergei ak tyong'ik che pegu.