TIENWOGIKAL 48 - BUKUIT NE TILIIL Sireet ne Dutero Kanon

Kimnateetap Zion

¹ Oo Kamuktaindet ne Toroor, ak kanyool kilas miising' eng' nganaseennyi ak eng' tulweennyi ne tiliil.

² Mi tulweetap Zion ole karaaran ak ole tagunoot niito poiboindap ng'wony komugul, tokyingei murot kaataam, nganaseetap Laitoryat ne oo.

³ Eng' kooriik che eecheen che po nganasanooto ko kigoboorgei Kamuktaindet koek ole kimwechin.

⁴ Ogeero, ki koyumgei laitorinik, ki pa tugul kibagenge.

⁵ Kingo keer nganasanooto, ko kitang'aang'ji; ki toptobenso, ak ki pa kochaakta.

⁶ Ki potanso eng' olooto; ki nyoor ng'wanindo ko uu kwondo ne machei kosigiis.

⁷ Ibute melisyek che po Tarsis eng' usoonet ne punu kong'asiis.

⁸ Ko uu ye ki kigas ko kage keer eng' nganaseetap Kamuktaindet ne Toroor ne po lugoosyek, eng' nganaseetap Kamuktaindennyo; ne igimiti Kamuktaindet koigeny.

⁹ Ki kibwaat agobo chamyeng'ung' ne tala, ee Kamuktaindet, eng' hekalung'ung' oriit.

¹⁰ Ko uu ole teptoi kaineng'ung', ee Kamuktaindet, ko uu nooto kalasuneng'ung' agoi ole poochin ng'wony. Nyiitaat imanda eung'ung' ne po tai.

¹¹ Ingogaskei tulweetap Zion, ingoboiboitu piigap Judah, amu kirwoogutiguk.

¹² Obendatee Zion, omuut, oiit teeksosyek che kooen.

¹³ Obwaat komyee irimoikyik, obwaat kooriikyik che eecheen; si kobiit omwachi ibinda ne piitu let, oleenji:

¹⁴ “Kamuktaindet niito ko Kamuktaindennyo koigeny ak koigeny. Egu ineendet kandoindennyo koigeny.”