TIENWOGIKAL 47 - BUKUIT NE TILIIL Sireet ne Dutero Kanon

Kandoinateetap Kamuktaindet

¹ Oraprap eunekwok, okweek piik tugul; ooren eng' Kamuktaindet eng' cheetap katerteeret.

² Amu po kwong'et Kamuktaindet ne Toroor, Inee Ne Toroor Miising'; Ineendet ko Laitoryat ne oo ne pou ng'wony komugul.

³ Iterteerwech `ineendet piik si kebou, Ak koterteerwech pororyosyek eng' keelyekyok.

⁴ Lewenwech ineendet porotennyo, inee ko telunatetap Jakobo ne ki chamei.

⁵ Ki togosta Kamuktaindet eng' tuleet, ki togosta Kamuktaindet ne Toroor ak cheetap iryageet.

⁶ Otyenji Kamuktaindet eng' kalasunoik, otyen kalasunoik; otyenji Laitoryandennyo eng' kalasunoik, otyen kalasunoik.

⁷ Otyenjin Kamuktaindet kalasunoik eng' tyendo ne ki kisir amu ineendet ko laitoryatap ng'wony komugul.

⁸ Pou `Kamuktaindet pororyosyek; tebee Kamuktaindet ng'echerennyi ne tiliil ne po laitornatet.

⁹ Kagoyumgei kirwoogigap piik koek piigap Kamuktaindet ne po Abraham, amu long'osyegap ng'wony ko po Kamuktaindet; itoroorot inee miising'.