TIENWOGIKAL 44 - BUKUIT NE TILIIL Sireet ne Dutero Kanon

Saaetap Toreteet

¹ Kigegas eng' itiikyok, ee Kamuktaindet, ki komwaiwech kwanisyekyok, poisyosyek che ki iyai eng' peetuusyekwak che ki po keny:

² Keele, eng' eung'ung' ko ki ioon pororyosyek, ak ki igoochi cheguuk komeny olooto; ki inyaliil inyee piik, ago icheeget cheguuk ko ki ityaach.

³ Amu ma nam emet eng' rotonikwak po chok, ama sar icheek `eunekwak; ago eung'ung' ineegei ne po tai, ak lapkeiyetap togeng'ung', ko ki icham icheek.

⁴ Ii Laitoryandennyu ak Kamuktaindennyu; iyookyi Jakobo saruunet.

⁵ Kiterteeri puunikyok eng' inyee; ak eng' kaineng'ung' ketyeche che machei kong'eetyeech.

⁶ Ma kwangennyu ne amang'u, ama rotwennyu po chok ne sarwo.

⁷ Ago inyee ne ki isarwech eng' puunikyok, ak ki igoochi kolilaanso che wechech.

⁸ Kilasunegei Kamuktaindet peetuut komugul, ak kiweekyini kongoi kaineng'ung' koigeny.

⁹ Ago kaibagaaktech ak kaigoonech kililanse; ama iwe inyee kobooto lugosyekyok.

¹⁰ Kegoonech kemwee puunikyok, ak kanyabanjigei che wechech tuguuk che luulei.

¹¹ Keyaech kegergeitu ak keechiirek che kienyei; ak ki iyestech kebe ye mi pororyosyek.

¹² Ialdoi piiguk puch, ama tesun kiy icheek.

¹³ Kegoonech keegu che iteweeri piikyok che po kok, sasech ak kororechinech icheeget che mi komoswekyok.

¹⁴ Kegoonech keegu kalewenet eng' kwenutap pororyosyek, ak kolelegoti piik metowek agobo acheek.

¹⁵ Mi tainnyu teweernateet peetuut komugul, ak kagotuch togeennyu kalilanet,

¹⁶ amu kutitap ineendet ne rosu ak kochubisyei, amu puunyoot ak ne yaaktoi mugetuut.

¹⁷ Kabwanjech chuuto tugul; ago tomo keutyenen, anan keboisyee kayomiseng'ung' eng' lembechek.

¹⁸ Tomo keweekyigei let eng' mugulelwekyok, anan kemaste kemete oreng'ung',

¹⁹ Nga uu nooto ko ki ibirech miising' eng' kwenutap suik, ak ki itugenech mesundeito ne oo.

²⁰ Ngo ki kageutye kainetap Kamuktaindennyo, anan ketokyi eunekyok kamuktain age;

²¹ ko tos ma cheeng'ei konai Kamuktaindet niito? Amu ingen inee ung'ootigap muguleldo.

²² Kibarech peetuut komugul agobo inyee; ak ki iitech ko uu keechiirek che po eng'seet.

²³ Ng'eet, ee Kiptaiyat, amu nee si iru? Ng'eet, amebagaaktech agoi.

²⁴ Amu nee si iuny togeng'ung', ak iutye nyalildanyo ak sastaennyo?

²⁵ Kagong'uruukso anyun saboonwekyok kotokyigei temburyek; kanamjigei `mootinwekyok ng'wony.

²⁶ Ng'eet, toretech! Ityachech amu chamyeng'ung' ne tala.