TIENWOGIKAL 42 - BUKUIT NE TILIIL Sireet ne Dutero Kanon

BUKUITAP AENG' (TYENWOGIGAP KALASUNET 42-72)

¹ Ko uu ye isyenyi teweretyot agobo kereruusyegap peek, kosyenyi ko uu nooto saboondanyu agobo inyee, ee Kamuktaindet.

² Amei saboondanyu melelda agobo Kamuktaindet, Kamuktaindet ne sabei. Auiyo ye anyoone tainnyi si ageer togeetap Kamuktaindet?

³ Kaek peekyuk po kong' amitwogikyuk che po peet ak kemoi, ye teebena icheek peetuut komugul koleen, “Mi ano Kamuktaindeng'ung'?”

⁴ Abwaati tuguuchu, ak ang'aanye saboondanyu eng' oriitinnyu, ko uu ye ki kibe ak tuiyet, ak andochi koba kootap Kamuktaindet, eng' kutit ne po poiboiyet ak kalasunet, kobooto tuiyet ne kiriibei peetuutap igoorto.

⁵ Amu nee si ing'uruuge, ee saboondanyu? Amu nee si iimge eng' anee? Imang'u Kamuktaindet; amu ta alasu ineendet amu yetunet ye mi ineendet kobooto.

⁶ Ing'uruuksei saboondanyu eng' anee; eng' nooto anyun abwaatin, ee Kamuktaindennyu, eng' emetap Jordan ak eng' Hermon tugul, ak tulweetap Mizar.

⁷ Kuurei `rireet rireet age eng' cheetap peeguk che isururtoi. Ki komaluucha peeguk tugul che mildogei ak che somotitogei.

⁸ Ng'atei Kamuktaindet ne Toroor pet chamyennyi ne tala, ak mi kobooto tyendanyi kemoi, nooto saaet eng' Kamuktaindetap saboondanyu.

⁹ Aleenjini Kamuktaindet ne rwandennyu, “Amu nee si iutyeno? Amu nee si awo ariiroti amu kanyaliiletap puunyoot?”

¹⁰ Ko uu ye toorei rotweet kawekyuk; ko sasa puunikyuk, ak koteebena kotugul kole, “Mi ano Kamuktaindeng'ung'?”

¹¹ Amu nee si ing'uruuge, ee saboondanyu? Amu nee si iimige eng' anee? Imang'u Kamuktaindet; amu ta alasu ineendet, ineendet toretindennyu ak Kamuktaindennyu.