TIENWOGIKAL 41 - BUKUIT NE TILIIL Sireet ne Dutero Kanon

Ineendet ne ibwaati che nyerootiin

¹ Paibai miising' ineendet ne ibwaati che nyerootiin; saru `Kamuktaindet ne Toroor ineendet eng' peetuutap nyalilda.

² Riibei `Kamuktaindet ne Toroor ineendet ak kogoochin kosap, ak kobaibait eng' emet; Ak amegoochi puunikyik koboi ineendet.

³ Tiiei `Kamuktaindet ne Toroor ineendet ye myani eng' itogunnyi; isoobi eng' myanwekyik tugul.

⁴ Ki amwa ale, “Ee Kamuktaindet ne Toroor, rirenagei; isoop saboondanyu, amu ki ayaun tengekto.”

⁵ Mwaitaena puunikyuk yaityo koleen, “Meei auyo, ak petei kainennyi au?”

⁶ Ak ngo pwa kogeera, kong'alaali lembechek; iyumi mugulelwekwak yaityo agobo anee, ak ye kagomanda, komwaitaat.

⁷ Chaamjingei ng'aleek agobo anee, tugul che wecho; ibwaati icheek koyaak che yaach agobo anee.

⁸ Mwaei koleen, “Ki konam kiy ne ya ineendet, ak kagoru ama kong'eetei kogeny.”

⁹ Agot chorwennyu ne ki kichamdosi, ne ki amang'u, ne ki abae, ko kagong'eetyo kole koyaiywo ne ya.

¹⁰ Ago rireena, ee Kamuktaindet ne Toroor, ing'eeta, si ayaakyi mugetuut.

¹¹ Kaanai eng' ni ale iboiboitunena, amu ma orenena punyondennyu.

¹² Ak itia eng' kagesunatennyu pogei, ak igoono atonon eng' taing'ung' koigeny.

¹³ Ingitoroor Kamuktaindet ne Toroor, Kamuktaindetap Israel, kobooch keny agoi koigeny. Amen, ak Amen.