TIENWOGIKAL 40 - BUKUIT NE TILIIL Sireet ne Dutero Kanon

Mwaetap kongoi agobo katyaknateet

Po ne oo eng' Putiik. Tyendap Kalasunet ne po Daudi.

¹ Ki aagen miising' Kamuktaindet ne Toroor; ak ki epcha iit, kogas riirekyuk.

² Ki kanabwa kora amang'une keriinget ne kiywei, eng' ng'atatyat ne meneet. Ki nama atonon eng' rwandet, ak ki igimit ole abunoti.

³ Kagonde kutinnyu tyendo ne leel, nooto kalasunet eng' Kamuktaindennyo. Keerei che chaang' ak koywei, ak komang' Kamuktaindet ne Toroor.

⁴ Paibai miising' chiito ne imang'u Kamuktaindet ne Toroor, ne ma tiytiy menotik, ama weekyingei lembechek.

⁵ Ee Kamuktaindet ne Toroor Kamuktaindennyu, ki iyai poisyonik che chaang' che kikwong'ee, kabwaatutik che ibwaate agobo acheek; koma kimuuchi ketetun. Ngot ale amwaita ak ang'alaalee, ko chaang' miising' kot koma kimuuchi kiit.

⁶ Mebaibaitune tiseiywot ak kagoochinet, memache kagoochinet ne kibeelei ak kagoochinet ne po tengekto; ago ki iyat itiikyuk si agasin.

⁷ Amwa anyun ale, “Keero, kaanyo; ki kisir agobo anee eng' bukuit ne ki kimaman.

⁸ Abaibai ayai mageng'ung', ee Kamuktaindennyu, miitei ng'atuutyeng'ung' muguleldanyu.”

⁹ Ki aamde logoiywegap poiboiyet che po katyaknateet eng' tuiyet ne oo; keero, tomo ager kutinnyu, ee Kamuktaindet ne Toroor, ko uu ye ingen inyee.

¹⁰ Ki ma uny imandang'ung' eng' muguleldanyu; ki abarte imandang'ung' ak yetuneng'ung'; ki ma uny chamyeng'ung' ne tala ak imaning'ung' eng' tuiyet ne oo.

¹¹ Ee Kamuktaindet ne Toroor, amemelela rireenosyeguk che po chamyet. Ingoriibo chamyeng'ung' ne tala ak imaning'ung' peetuusyek tugul.

Saaet agobo Toreteet

¹² Amu ki koyiema yaitwogik che ma kimuuchi kiit, kigonyoorwo tengekwogikyuk kot koma amuuchi ageer kiy; chaang' kosiir suumeegap metinnyu, ak kogonyeratit muguleldanyu.

¹³ Cham, ee Kamuktaindet ne Toroor, ieta! Ee Kamuktaindet ne Toroor, chogu toreto.

¹⁴ Ingolilanso ak kotoptobenso icheek che cheeng'ei kong'em saboondanyu. Ingolit oliin ak kolilaanso che poiboi ye anyalili.

¹⁵ Ingoek ponoon amu teweernatennywa che leenjino, “Haa, Haa!”

¹⁶ Ago ingogaskei ak koboiboitu tugul che cheeng'in. Ingomwa tugul che chamei yetuneng'ung' kotugul kole, “Ingotororit Kamuktaindet ne Toroor!”

¹⁷ Anee, aa nyalili, ama tinyei kiy; ago ibwaata Kiptaiyat. Ii toretindennyu ak ko ii yetindennyu; amegagei, ee Kamuktaindennyu.