TIENWOGIKAL 39 - BUKUIT NE TILIIL Sireet ne Dutero Kanon

Saaet agobo utaatyet ak nyoetap kaat

Po ne oo eng' Putiik: po Jeduthun. Tyendap Kalasunet ne po Daudi.

¹ Ki amwa ale, ariibe ortinwekyuk, si ma mwa `ng'elyeptanyu tengek. Ageree kutinnyu `karnet, ye ta komi tainnyu kiptengeginik.

² Kinamak kutinnyu ak ki asiis, ki asiisigei ak ma walak kiy; ak kitesak aragenennyu,

³ ak eng' oriitinnyu ko king'eetyi `maat muguleldanyu. Ye kita abwaatoti, kolal maat; yeityo amwa eng' ng'elyeptanyu ale:

⁴ “Ee Kamuktaindet ne Toroor, chamwo anai kagesunennyu, ak ole pooch peetuusyekyuk, ak kiit ne tuun egu; chamwo anai ole uu chaktaetap sabeennyu.

⁵ Keero, ki iroge peetuusyekyuk tebeesindap euut; ama tilei kiy eng' inyee kenyiisyekyuk kotee asabe. Iman, agot nda myee ne tya chii age tugul, ko puch.”

⁶ Iman wendoti chii age tugul ko uu urwet ne siirtoi; iman iimegei pichooto puch; iyumi tuguuk, ama naei ne tuun punjin.

⁷ Ara nguno anyun, ee Kiptaiyat, ta ageni nee? Inyee iman kamang'unennyu.

⁸ Ityacha eng' pistaosyekyuk tugul. Ameng' aek ne iteweeri abusanik.

⁹ Kinamak kutinnyu ak ki asiis; ma atwegu, amu inyee ne ki iyae.

¹⁰ Iistoena pireeng'ung'; kaiwong'wa kweretap eung'ung'.

¹¹ Ye itigoni chii eng' kereetap kong' amu tengekto, iistoi karaaranindanyi ko uu ye amei kiptorotyot. Iman, puch chii tugul.

¹² Kas saaennyu, ee Kamuktaindet ne Toroor; epchi iit riirekyuk; amat isiis igeere peekyuk po kong'. Amu aa kiprutoiyot kobooten, aa punootyot ko uu ye ki punootik kwanisyekyuk tugul.

¹³ Undaa, si anyoor kimnateet kogeny, kotom asiirte eng' yu, ama ami kogeny.