TIENWOGIKAL 38 - BUKUIT NE TILIIL Sireet ne Dutero Kanon

Saaet ye mi chii ne nyalili

Tyendap Kalasunet ne po Daudi, ne po kabwaatet.

¹ Ee Kamuktaindet ne Toroor, amegera kong' eng' nereegeguk; ameneeta eng' nereegeguk che koroomen.

² Amu ki komwogo kipchaboniguk, ak irurunyo eung'ung' miising'.

³ Ma kosabei poortanyu amu nereegeguk; ama komi kamuung'et kawekyuk amu tengektonyu.

⁴ Amu kagomaluucha tengekwogikyuk; kagotemena ko uu mileet ne nyigiis.

⁵ Kagosamisitu mookyuk ak kogonunio, amu abusnatennyu.

⁶ Kaarigage ak ang'uruuksei miising'; ariiroti peet komugul.

⁷ Amu nyiitaat ng'wanindo suennyu; ama kosabei poortanyu.

⁸ Kanyaratitu ak kagonyanya poortanyu; atigeni amu nyalildap muguleldanyu.

⁹ Ee Kiptaiyat, mi taing'ung' magennyu tugul; ama ung'aat tigenennyu eng' inyee.

¹⁰ Rukrugeni muguleldanyu, kogobetwa kimnateennyu; kogomanda agine lapkeiyet eng' konyekyuk.

¹¹ Tonondos eng' ole loo che chama ak choronokyuk si ma riikyi nyalildanyu; ak tonondos eng' ole loo tilyonutikyuk ak icheek.

¹² Chobei mestonok kole konama icheeget che cheeng'ei saboondanyu; mwaei yaitwogik icheeget che cheeng'ei koyaiywo ne ya, ak kobwaatoti ng'aalsosyek peet komugul.

¹³ Ago aa uu chii ne miing'at, ne ma kastoi, aa uu ne namaat kuut, ne ma twegu.

¹⁴ Ee, aa uu chiito ne ma kastoi, ne ma tinyei ng'olyoo ne saruunegei.

¹⁵ Amu amang'un inyee, ee Kamuktaindet ne Toroor; inyee ne iwolu, ee Kamuktaindet ne Toroor, Kamuktaindennyu.

¹⁶ Asaae ale, si ma poiboitunena; ye kagochabaita keldanyu, kolasunenogei.

¹⁷ Amu neegit aterteryot, ak mi aragenennyu tainnyu kotugul.

¹⁸ Ang'aanye tengektonyu; aarageni amu chalwoktanyu.

¹⁹ Saptos komyee puunikyuk, ak ko kiimeen; ak kagotesagis icheek che wecho puch.

²⁰ Kaek puunikyuk che yaaktoi yaityet eng' ne myee, amu asubi kiit ne myee.

²¹ Mebagaakta, ee Kamuktaindet ne Toroor; ee Kamuktaindennyu, amelooitena.

²² Chogu toreto, ee Kiptaiyat, yetunennyu.